Bosh vazir o‘rinbosari — Oila va xotin-qizlar davlat qo‘mitasi raisi Zulayho Mahkamova 2-iyun kuni o‘tkazilgan matbuot anjumanida ayollarga nisbatan bo‘layotgan zo‘ravonlik va tazyiq holatlari yuzasidan munosabat bildirdi. Bu haqda “Daryo” muxbiri xabar bermoqda.
Uning ta’kidlashicha, O‘zbekiston Konstitutsiyasining 13-moddasida inson va uning daxlsiz huquqlari eng oliy qadriyat darajasida belgilab qo‘yilgan. Shaxs dahlsizligi, uning sha’ni, qadr-qimmati, haq-huquqini toptashga hech kim haqli emasligi, nafaqat mamlakat bosh qomusida, balki barcha qonunosti hujjatlarida ham qayd etilgan.
“Xotin-qizlarning huquq va manfaatlarini sud, ichki ishlar va boshqa mas’ul tashkilotlar bilan birgalikda barcha jarayonlarda himoya qilish vakolatiga egamiz. Shuningdek, tahqirlangan, haq-huquqlari himoyalanmagan ayollar bo‘yicha tegishli tashkilotlarga taqdimnomalar kiritib, qonuniy choralar ko‘rish orqali yaqindan himoya qilish imkoniyatlarimiz bor.
Kuni kecha ijtimoiy tarmoqlarda Andijon viloyatida bir o‘gay ona qizini kaltaklab kelayotgani haqida xabarlar tarqaldi. Ishchi guruhimiz tomonidan o‘sha holat o‘rganildi va bu bo‘yicha bir qancha davlat tashkilotlariga taqdimnomalar kiritdik. Natijada o‘gay onaga jinoyat ishi qo‘zg‘atildi va hozir dastlabki tergov harakatlari o‘tkazilmoqda.
Ba’zi joylarda samosud holatlari ham kuzatilmoqda. O‘sha hududlardagi jamoatchilik bilan birga ishlashni o‘z manfaatlarimiz yo‘nalishiga kiritganmiz. Chunki noxush holatlarning oldini olishda o‘sha atrofdagi odamlar, tahqirlanayotgan insonning yaqinlari muhim rol o‘ynaydi va holat haqida ham tegishli tashkilotlarni zudlik bilan boxabar qiladi.
O‘zim ham bunday tazyiq va zo‘rvonlik holatlariga qarshiman. Yangi tashkil etilgan Oila va xotin-qizlar davlat qo‘mitasi tizimida ham bunday hatti-harakatlar qoralanadi hamda bunga yo‘l qo‘yilmaydi”, — deydi Bosh vazir o‘rinbosari.
Izoh (0)