IT sohasini egallash uchun alohida iqtidor va yaxshi muhit kerak. Bu haqda 4-iyun kuni Toshkent viloyatida bo‘lib o‘tgan “mGovAward” tanlovi ochilishida IT-Park direktori Farhod Ibrohimov aytib o‘tdi, deya xabar bermoqda “Daryo” muxbiri.
Farhod Ibrohimovning aytishicha, oxirgi paytda IT sohasida nafaqat o‘g‘il bolalar, balki qizlar ulushi ham ortib bormoqda.
“Eng e’tiborli masala, IT sohasida qizlar soni avvalgi yillarga qaraganda ancha oshgan. Bu respublikada ta’lim olish masalasida ayollarning roli kattaligini ko‘rsatadi. “mGovAward” respublika tanlovi ham yoshlarni IT bo‘yicha yaratgan loyihalarini baholash va ularga ko‘mak berish uchun tashkil qilinadi. Ko‘p yoshlar bir nechta viloyatlar va oliy o‘quv yurtlaridan bo‘lsa-da, tanlovda birga hujjat topshirib, jamoa bo‘lib ishalashni o‘rganmoqda. Biz IT sohasini o‘rganmoqchi bo‘lgan bolalar uchun yaxshi sharoit va muhit yaratib berishimiz kerak va buning ustida ishlayapmiz. Avvallari bugungidek sharoitlar yo‘q edi. Bu sohaga qiziquvchi yoshlar bir necha yil oldin ham bugungi qiziquvchilarning 10 dan biricha ham chiqmasdi. Hozir millionlab yoshlar IT’ga qiziqadi. IT o‘quv markazlarida yoshlarni eng iqtdorlilari birga bilim olib, o‘smoqda. Iqtidorli bolalar uchun ham joylar yaqin-yaqingacha yetarli bo‘lmagan. Mana hozir sharoit ancha yaxshilanyapti”, – dedi u.
Ma’lum qilinishicha, tanlovda g‘olib bo‘lgan yoshlar BAA va IT-Park’da 6 oy o‘qish davomida akseleratsiya dasturidan o‘tish imkoniga ega bo‘ladi.
“Mazkur tanlovda qatnashish uchun yoshlar tomonidan 900 ta ariza topshirilgan va finalga 20 ta loyiha yetib keldi. Endi shundan ham 3 tasi g‘olib bo‘ladi. 1-o‘rinni egallagan jamoa 50 ming dollar, 2-o‘rin 30 ming dollar, 3-o‘rinni olgan yoshlar 20 ming dollar mukofot bilan taqdirlanadi”, – dedi Farhod Ibrohimov.
Avvalroq O‘zbekistonda IT bo‘yicha ta’lim olayotgan talabalarning 30 foizi qizlar ekani ma’lum qilingandi.
Izoh (0)