Toshkent viloyati Keles temiryo‘l bekatida 23-may kuni yuk poyezdi vagoni ustiga chiqqan ikki nafar maktab o‘quvchisini tok urgani haqida xabar berilgandi. Ichki ishlar vazirligi holat yuzasidan qo‘shimcha ma’lumot berdi.
Ma’lum qilinishicha, ikki nafar voyaga yetmagan maktab o‘quvchilaridan biri zina yordamida temiryo‘lda turgan yuk vagonlari ustiga chiqib, atrofni kuzatmoqchi bo‘lgan. Shunda bolani kutilmaganda yuqori kuchlanishli (27 ming volt) tok urgan. Oqibatda u pastga yiqilib, jiddiy tan jarohati olgan.
Bolaning old ko‘krak qismi va qorin qismi, chap qo‘li va chap ko‘krak qismlari va soni kuyish jarohatini olgan. Umumiy kuyish hajmi 60 foiz. Shundan 10 foiziga chuqur diagnoz qo‘yilgan. Bolaning o‘ng qo‘l tirsagi singani tufayli operativ muolaja o‘tkazilgan. Teri ko‘chirib o‘tkazish operatsiya muvaffaqiyatli amalga oshirilgan. Bolaning ahvoli stabil, hayotga xavf tug‘diruvchi holatlar yo‘q.
Ikkinchi bola esa kuyish jarohati olgan. Birinchi tibbiy muolaja ko‘rsatilib, ota-onasiga topshirilgan.
Eslatib o‘tamiz, 2021-yilning yanvarida Toshkentda poyezd ustida selfi qilmoqchi bo‘lgan 18 yoshli yigitni 27 ming voltli tok urgandi. Oqibatda yigit qattiq jarohatlangan.
Izoh (0)