Бош вазир ўринбосари — Оила ва хотин-қизлар давлат қўмитаси раиси Зулайҳо Маҳкамова 2 июнь куни ўтказилган матбуот анжуманида аёлларга нисбатан бўлаётган зўравонлик ва тазйиқ ҳолатлари юзасидан муносабат билдирди. Бу ҳақда «Дарё» мухбири хабар бермоқда.
Унинг таъкидлашича, Ўзбекистон Конституциясининг 13-моддасида инсон ва унинг дахлсиз ҳуқуқлари энг олий қадрият даражасида белгилаб қўйилган. Шахс даҳлсизлиги, унинг шаъни, қадр-қиммати, ҳақ-ҳуқуқини топташга ҳеч ким ҳақли эмаслиги, нафақат мамлакат бош қомусида, балки барча қонуности ҳужжатларида ҳам қайд этилган.
«Хотин-қизларнинг ҳуқуқ ва манфаатларини суд, ички ишлар ва бошқа масъул ташкилотлар билан биргаликда барча жараёнларда ҳимоя қилиш ваколатига эгамиз. Шунингдек, таҳқирланган, ҳақ-ҳуқуқлари ҳимояланмаган аёллар бўйича тегишли ташкилотларга тақдимномалар киритиб, қонуний чоралар кўриш орқали яқиндан ҳимоя қилиш имкониятларимиз бор.
Куни кеча ижтимоий тармоқларда Андижон вилоятида бир ўгай она қизини калтаклаб келаётгани ҳақида хабарлар тарқалди. Ишчи гуруҳимиз томонидан ўша ҳолат ўрганилди ва бу бўйича бир қанча давлат ташкилотларига тақдимномалар киритдик. Натижада ўгай онага жиноят иши қўзғатилди ва ҳозир дастлабки тергов ҳаракатлари ўтказилмоқда.
Баъзи жойларда самосуд ҳолатлари ҳам кузатилмоқда. Ўша ҳудудлардаги жамоатчилик билан бирга ишлашни ўз манфаатларимиз йўналишига киритганмиз. Чунки нохуш ҳолатларнинг олдини олишда ўша атрофдаги одамлар, таҳқирланаётган инсоннинг яқинлари муҳим рол ўйнайди ва ҳолат ҳақида ҳам тегишли ташкилотларни зудлик билан бохабар қилади.
Ўзим ҳам бундай тазйиқ ва зўрвонлик ҳолатларига қаршиман. Янги ташкил этилган Оила ва хотин-қизлар давлат қўмитаси тизимида ҳам бундай ҳатти-ҳаракатлар қораланади ҳамда бунга йўл қўйилмайди», — дейди Бош вазир ўринбосари.
Изоҳ (0)