Surxondaryodan poytaxtga yo‘l olgan Damas’da kelib chiqishi noma’lum 700 kilodan ortiq go‘sht olib ketilayotgani aniqlandi.
Qashqadaryo viloyati IIB matbuot xizmatining ma’lum qilishicha, go‘sht ortilgan ushbu mashina viloyatning Ko‘kdala tumanda joylashgan “Umakay” muntazam YPX maskanida to‘xtatib qolingan.
Surxondaryo—Toshkent yo‘nalishida harakatlanib kelgan Damas 4-iyun kuni soat 00:30 larda to‘xtatilib, Qashqadaryo viloyati IIB JXX JTSB Karantin bo‘linmasi va YHXB xodimlari tomonidan tekshirilgan.
Avtomashina saloni ko‘zdan kechirilganda, uning salonida tegishli veterinariya ma’lumotnomalarisiz, kelib chiqishi noma’lum bo‘lgan, taxminan 700 kilo og‘irlikdagi no’malum hayvon go‘shtlari borligi aniqlanib, ularning sifatini aniqlash maqsadida Qashqadaryo viloyat oziq-ovqat mahsulotlari xavfsizligi mikrobiologiya va veterinariya-sanitariya ekspertiza loborotoriyasiga topshirilgan.
Bundan avval ushbu muntazam YPX maskanida salkam 1 tonna iste’molga yaroqsiz go‘sht olib o‘tilishiga chek qo‘yilgandi. Shuningdek, kelib chiqishi noma’lum 830 kilo go‘sht mahsulotlarini olib ketayotgan Cobalt, yana bir mashinada esa kasal bo‘lib so‘yilgan 700 kilogrammga yaqin chorva mollari go‘shti Qashqadaryodan Toshkentga olib kirilayotganda to‘xtatib qolingandi.
Izoh (0)