Евроиттифоқ санкцияларига учраган «Яндекс» асосчиси Аркадий Волож барча лавозимларидан бўшади. Компания акциялари тушиб кетди

Евроиттифоқ Россияга қарши санкцияларнинг олтинчи пакети доирасида «Яндекс» компанияси асосчиси Аркадий Воложни санкция рўйхатларига киритди, деб ёзади Meduza.

Бу эълон қилинганидан кейин ярим соат ўтиб, компания Аркадит Волож «Яндекс» компаниялар гуруҳи директорлар кенгашини ва бош директор лавозимини тарк этишини маълум қилди. Шунингдек, Волож «Яндекс»нинг шўъба халқаро компанияларидаги раҳбарлик лавозимларидан ҳам кетади.

«Бу қарорни хато ва охир-оқибат фойдасиз деб ҳисобласам-да, санкциялар амал қилаётган вақтда оилавий фондимга қандайдир кўрсатмалар бермоқчи эмасман. Бу вақт мобайнида траст директорлар кенгаши тавсияларига мувофиқ овоз беради. Бу қарор компания ва унинг акциядорлари манфаатларига жавоб беради, аммо мен компанияга иложи бўлган соҳада ёрдам беришда давом этаман», — дея компания ўз пресс-релизида Воложнинг баёнотини келтирди.

Воложнинг санкциялар рўйхатига киритилиши ҳақидаги янгиликлар фонида «Яндекс» акциялари биржада 10 фоиздан кўпроққа тушиб кетди.

Шахсий санкцияларга тушган бошқа одамлар орасида «Миллий медиа гуруҳи» директорлар кенгаши раиси Алина Кабаева, «Роскомнадзор» раҳбари Андрей Липов, Россия президенти матбуот котибининг қизи Елизавета Пескова ва рафиқаси Татяна Навка, Херсон вилояти «янги маъмурияти» раҳбари ва унинг ўринбосари Владимир Салдо ва Кирилл Стремоусов, шунингдек, Евроиттифоқ Бучада тинч аҳоли ўлдирилишига алоқадор деб ҳисоблайдиган 64-алоҳида мотоўқчилар бригадасининг 40 дан ортиқ ҳарбий хизматчилари бор.

Санкция рўйхатларига жами 60 дан зиёд жисмоний шахс ва 18 та компания, хусусан, «УАЗ», «КамАЗ», «Военторг» ва «Сухой» қўшилди.