Rossiya harbiylari Chernobil atom elektr stansiyasi (AES)ga 135 million dollardan ortiq hajmda zarar yetkazdi. Bu haqda The Washington Post gazetasi Ukrainaning zonani boshqarish bo‘yicha davlat agentligi rahbari Yevgeniy Kramarenkoga tayanib xabar bermoqda, deb yozadi Meduza.
Maqolada da’vo qilinishicha, rossiyaliklar tomonidan 698 ta kompyuter, 344 ta mashina, 1500 ta dozimetr, shuningdek, zonada o‘rmon yong‘inlariga qarshi kurash uchun zarur bo‘lgan o‘t o‘chirish qurilmalarining deyarli barchasi o‘g‘irlab ketilgan yoki yo‘q qilingan.
Yevgeniy Kramarenkoning so‘zlariga ko‘ra, o‘g‘irlangan uskunalarning bir qismi GPS-datchiklar bilan jihozlangan bo‘lib, ular o‘zining joylashgan joyi haqida ma’lumot uzatishda davom etmoqda. Ushbu ma’lumotlarga ko‘ra, uskunalar Belarus hududida turibdi.
The Washington Post, shuningdek, stansiyaning to‘qqiz xodimi o‘ldirilgani va besh kishi o‘g‘irlab ketilgani haqida yozmoqda. Maqolada voqealar tafsilotlari keltirilmagan. Avvalroq obyektni qo‘riqlayotgan Milliy gvardiya xodimlari o‘g‘irlab ketilgani xabar berilgandi.
Rossiya qo‘shinlari Chernobil AESni urushning birinchi kuni egallab olgandi. O‘sha payti stansiyada bo‘lgan xodimlar bir necha hafta smenasiz ishlashga majbur bo‘lgan. Mart oxirida Rossiya qo‘shinlari Ukraina shimolidagi hududdan chekindi.
May oxirida Ukraina bosh prokurori Irina Venediktova Rosgvardiya general-mayori Oleg Yakushevga qarshi jinoyat ishi haqida ma’lum qildi. U Rossiya qo‘shinlariga Chernobil AESdan “stanoklar, uskunalar va ofis texnikasidan tortib mebel va kiyim-kechakkacha” bo‘lgan “2000 donadan ortiq mol-mulkni” o‘g‘irlab ketishni buyurgan. O‘marilgan buyumlar qiymatini tergov 26 million grivna (taxminan 880 ming dollar)ga baholadi.
Rossiya hukumati Ukrainaning bosib olingan hududlarida amalga oshirilgan jinoyatlar haqidagi xabarlarni butunlay rad etmoqda. Guvohlarning gaplari, foto va videomateriallarni Rossiyada soxtakorlik yoki ig‘vogarlik deb atashmoqda.
Mavzuga doir:
- Buzib tashlangan “xalqlar do‘stligi”. Chernobil fojiasining 36 yilligi. Urushning 62-kunidan fotoreportaj
- Chernobildagi rus okoplari, yozuvchi Taras Shevchenkoning “yaralangan” haykali. Urushning 43-kunidan fotoreportaj
- Rossiya qo‘shinlarining ikki kolonnasi Chernobil AESni tark etdi. Ukraina stansiyani qo‘riqlayotgan milliy gvardiyachilar o‘g‘irlab ketilganini ma’lum qildi
- Rossiya qo‘shinlari Chernobil AESni tark etishni boshladi — AFP
- Moskva va Kiyev Chernobil AESni birgalikda qo‘riqlashga kelishib oldi
- Rossiya Chernobil AES hududi egallangani va Ukrainadagi 118 ta harbiy obyekt ishdan chiqarilganini ma’lum qildi
Izoh (0)