“Tolibon” harakati Afg‘oniston poytaxtini Kobuldan mamlakat janubidagi Qandahor shahriga ko‘chirmoqchi. Bu haqda Afg‘oniston sobiq vitse-prezidenti Amrulla Solih ma’lum qildi, deb yozadi “TASS”.
“Toliblar hech qanday oldindan ogohlantirishsiz Afg‘oniston poytaxtini Qandahorga ko‘chirmoqchi”, — dedi Solih. Sobiq vitse-prezident ma’lumotlariga ko‘ra, ayni paytda “Kobul ma’muriy poytaxtga aylantirilishi hamda siyosiy keskinliklar va hukumatga qarshi chiqishlardan izolyatsiya qilinishi kerak”.
Solih da’vo qilishicha, mamlakat parlamentiga saylovlar “Tolibon” yetakchisi Haybatulla Oxunzoda rahbarlik qiladigan maxsus qo‘mita nazorati ostida bo‘lib o‘tadi. Parlamentning o‘zi nafaqat bosh vazir dasturini tinglashi kerak bo‘ladi, balki uni ma’qullash yoki rad etish huquqiga ham ega bo‘lmaydi.
Afg‘oniston sobiq vitse-prezidenti, shuningdek, toliblarning bosh qarorgohi Qandahorda joylashadigan Oliy ulamolar kengashini tuzish qarori haqida ma’lum qildi. Aynan shu tuzilma, Solihning ma’lumotlariga ko‘ra, Oxunzodaning o‘limidan keyin harakatning yangi yetakchisini tayinlash vakolatiga ega bo‘ladi. Oliy ulamolar kengashi, shuningdek, o‘z odamlarini Afg‘oniston viloyatlariga yuboradi, ular mamlakatdagi oliy siyosiy va diniy hokimiyat vakillari vazifasini bajaradi.
Avvalroq Afg‘oniston qarshilik kuchlari Panjsherda janglar qayta boshlanganini ma’lum qilgandi. Xususan, Afg‘oniston Milliy qarshilik fronti (MQF) rasmiy vakili Ali Maysam Nazariy Panjsher darasida to‘qnashuvlar bo‘lib o‘tgani, buning oqibatida bir kechada 27 nafar toliblar o‘ldirilgani haqida 27-mayda ma’lum qilgan.
“Tolibon” 2021-yil avgustida Afg‘onistonda hokimiyat tepasiga kelgan edi. AQSH va uning ittifoqchilari o‘z qo‘shinlarini olib ketishni boshlaganidan keyin toliblar hujumga o‘tgan edi. Ular navbat bilan yirik shaharlarni egallab, avgust o‘rtasida Kobulga kirdi va davlat to‘liq egallab olinganini e’lon qildi. Prezident Ashraf G‘ani BAAga qochib ketdi.
Izoh (0)