Xitoy AQSH hukumatini Tayvandagi ayirmachilarni qo‘llab-quvvatlashda aybladi. Vashington uchun bu jiddiy oqibatlarga olib kelishi mumkin, dedi Xitoy Xalq Respublikasi tashqi ishlar vaziri Chjao Litszyan. Uning da’vo qilishicha, AQSH “Xitoyni manipulyatsiya qilish uchun” Tayvandan foydalanmoqda, deb yozadi “Kommersant”.
Xitoylik diplomat, xususan, amerikalik senator Temmi Dakuortning Taybeyga tashrifini tanqid qildi. U Tayvanga 31-may kuni kechqurun yetib kelib, orol ma’muriyati rahbari Say Inven bilan uchrashgandi. Bungacha amerikalik kongressmenlarning Tayvanga e’lon qilinmagan tashrifi aprelda amalga oshirilgan.
Xitoy TIV fikricha, AQSH shu tariqa “Tayvan mustaqilligi tarafdorlarini zimdan rag‘batlantiryapti va qo‘llab-quvvatlayapti”. “Bu Tayvan uchun xavfli va AQSH uchun jiddiy oqibatlarga olib kelishi mumkin”, — dedi Chjao. Uning da’vo qilishicha, Tayvan bo‘g‘ozida keskinlik kuchayishiga orol rahbariyatining AQSH bilan birgalikda “Xitoyni manipulyatsiya qilish uchun Tayvandan foydalanish”ga urinishlari sababchi bo‘lgan.
Avvalroq Xitoy TIV AQSHdan Tayvan bilan barcha rasmiy aloqalarni to‘xtatishni talab qilgandi. AQSH Davlat departamenti mamlakat “yagona Xitoy” tamoyiliga sodiqligini va Tayvan mustaqilligini qo‘llab-quvvatlamasligini ma’lum qildi. 23-may kuni esa Amerika prezidenti Jo Bayden agar Xitoy Tayvanga bostirib kirsa, AQSH “harbiy yo‘l bilan aralashishga” tayyorligini e’lon qildi. Keyinroq u Amerikaning Tayvanga nisbatan pozitsiyasi o‘zgarishsiz qolganini aytdi.
Xitoy Tayvan va AQSH o‘rtasidagi “til biriktirish”ga javoban Tayvan yaqinidagi havo va suv hududida patrullik olib bordi.
Izoh (0)