Ангела Меркель Россиянинг «ёввойи уруши»ни қоралади ва Украина билан бирдамлигини маълум қилди

Германия собиқ канцлери Ангела Меркель Украина билан бирдамлигини ва украинларнинг Россия билан урушда ўз мамлакатини ҳимоя қилиш ҳуқуқини қўллаб-қувватлашини маълум қилди, деб ёзади Meduza.

У бу ҳақда қарийб олти ой ичидаги биринчи оммавий нутқида айтиб ўтди. Бунгача Меркелнинг баёнотлари унинг офиси вакиллари томонидан тарқатилар эди.

Меркель Германия Касаба уюшмалари ассоциацияси раҳбари Райнер Хоффманнинг истеъфога чиқишига бағишланган тадбирда чиқиш қилди. У Украинада юз бераётган воқеаларни «варварлар уруши» деб атаб, уни иложи борича тезроқ тугатиш кераклигини айтди.

Собиқ канцлер сўзларига кўра, Россия босқини оқибатлари қанчалик давомли бўлишини ҳозирча ҳеч ким аниқ баҳолай олмайди. Бироқ улар, Меркелнинг фикрича, сезиларли даражада бўлади, айниқса украиналиклар учун. Унинг таъкидлашича, уруш чоғида тинч аҳоли жабрланган. «Бундай даҳшатга мисол қилиб Бучани айтиш мумкин», — деди у.

Ҳозирги вазиятда, деди Меркель, Евроиттифоқ бирдамлиги катта аҳамиятга эга. «Биз ҳеч қачон тинчлик ва эркинликни ўз-ўзидан юз берадиган нарса сифатида қабул қилмаслигимиз керак», — дея қўшиб қўйди собиқ канцлер. Шунингдек, у Германия ҳукумати, Евроиттифоқ ҳамда бошқа мамлакат ва халқаро ташкилотларнинг жанговар ҳаракатларни тўхтатишга қаратилган саъй-ҳаракатларини қўллаб-қувватлади.

Украинада уруш бошланганидан буён Ангела Меркель Россиянинг Украинага бостириб кириши юзасидан деярли ўз фикр-мулоҳазаларини билдирмаган эди. 25 февраль куни у урушни «Европа тарихида совуқ уруш даври тугаганидан кейинги кескин бурилиш ясаган воқеа» деб атади.

Собиқ канцлернинг ҳозирги баёноти Меркель ҳукуматининг Россияга нисбатан сиёсатига қарши танқидлар фонида янгради. Бундай танқидлар нафақат Германиянинг ўзида, балки Украина, АҚШ ва бошқа бошқа мамлакатлар томонидан ҳам айтилди.