Xitoyning Shanxay shahrida mart oxiridan buyon davom etib kelgan qat’iy karantindan keyin 1-iyun, chorshanba kuni odamlar yana ko‘chalarga chiqdi, metro liniyalari va do‘konlar ishga tushdi, deb yozadi “Interfaks”.
“Shanxayda ikki oylik karantindan keyin odatiy hayotga qaytishga qo‘yilgan ilk qadamlar sifatida COVID-19 bilan bog‘liq bir qator cheklovlar yumshatildi”, — deyiladi The Guardian gazetasi xabarida.
Ijtimoiy tarmoqlarga joylangan lavhalarda Shanxay aholisi vaqt yarim tundan o‘tishi bilan o‘yin-kulgi, xursandchilik bilan cheklovlar bekor qilinishini nishonlashni boshlaganini ko‘rish mumkin.
1-iyun holatiga ko‘ra, Shanxayda bor-yo‘g‘i 15 kishida kasallik aniqlangan, aprel oyida esa sutkalik ko‘rsatkich 20 mingtani tashkil qilgandi.
Shu bilan birga, koronavirusga testi musbat chiqqan odamlar va ular bilan bevosita aloqada bo‘lganlarning barchasi karantinda qolishi kerak bo‘ladi. Shuningdek, shahar aholisi jamoat transportidan foydalanish yoki ommaviy tadbirlarda qatnashish uchun har 72 soatda koronavirusga test topshirishi kerak.
Xitoy COVID-19 ga “nol chidamlilik” siyosatiga amal qiladi. Bu virus tarqalishini lokdaunlar va kasallanganlar bilan muloqotda bo‘lganlar uchun majburiy karantin orqali cheklashni anglatadi.
Pandemiya boshidan buyon Xitoyda koronavirus bilan kasallanish bo‘yicha 224 mingdan ortiq holat va 5,2 mingta o‘lim holati qayd etilgan.
Ta’kidlash joiz, qator mamlakatlar COVID-19 bilan bog‘liq cheklovlarni bekor qilmoqda. Xususan, Turkiyada kasallanish darajasi pasaygani sababli dastlab niqob taqish majburiyati olib tashlandi, 1-iyundan boshlab esa mamlakatga kirish uchun sayyohlardan PZR-testi yoki tezkor antigen testining salbiy natijalarini ko‘rsatish talab etilmaydigan bo‘ldi.
Tailand 1-iyundan boshlab barcha mamlakatlardan kelgan sayyohlar uchun majburiy karantin talabini bekor qildi. Shu vaqtga qadar xorijlik sayyohlar Tailandga kirganidan so‘ng ikki haftagacha karantin ostida bo‘lardi.
Kipr ham 1-iyundan sayyohlar uchun barcha cheklovlarni bekor qildi. Sayohatchilar endi emlanganlik haqidagi ma’lumotnomani, PZR-test yoki ekspress testning manfiy natijasini taqdim etishi shart emas.
Izoh (0)