«Толибон» ҳаракати Афғонистон пойтахтини Кобулдан мамлакат жанубидаги Қандаҳор шаҳрига кўчирмоқчи. Бу ҳақда Афғонистон собиқ вице-президенти Амрулла Солиҳ маълум қилди, деб ёзади «ТАСС».
«Толиблар ҳеч қандай олдиндан огоҳлантиришсиз Афғонистон пойтахтини Қандаҳорга кўчирмоқчи», — деди Солиҳ. Собиқ вице-президент маълумотларига кўра, айни пайтда «Кобул маъмурий пойтахтга айлантирилиши ҳамда сиёсий кескинликлар ва ҳукуматга қарши чиқишлардан изоляция қилиниши керак».
Солиҳ даъво қилишича, мамлакат парламентига сайловлар «Толибон» етакчиси Ҳайбатулла Охунзода раҳбарлик қиладиган махсус қўмита назорати остида бўлиб ўтади. Парламентнинг ўзи нафақат бош вазир дастурини тинглаши керак бўлади, балки уни маъқуллаш ёки рад этиш ҳуқуқига ҳам эга бўлмайди.
Афғонистон собиқ вице-президенти, шунингдек, толибларнинг бош қароргоҳи Қандаҳорда жойлашадиган Олий уламолар кенгашини тузиш қарори ҳақида маълум қилди. Айнан шу тузилма, Солиҳнинг маълумотларига кўра, Охунзоданинг ўлимидан кейин ҳаракатнинг янги етакчисини тайинлаш ваколатига эга бўлади. Олий уламолар кенгаши, шунингдек, ўз одамларини Афғонистон вилоятларига юборади, улар мамлакатдаги олий сиёсий ва диний ҳокимият вакиллари вазифасини бажаради.
Аввалроқ Афғонистон қаршилик кучлари Панжшерда жанглар қайта бошланганини маълум қилганди. Хусусан, Афғонистон Миллий қаршилик фронти (МҚФ) расмий вакили Али Майсам Назарий Панжшер дарасида тўқнашувлар бўлиб ўтгани, бунинг оқибатида бир кечада 27 нафар толиблар ўлдирилгани ҳақида 27 майда маълум қилган.
«Толибон» 2021 йил августида Афғонистонда ҳокимият тепасига келган эди. АҚШ ва унинг иттифоқчилари ўз қўшинларини олиб кетишни бошлаганидан кейин толиблар ҳужумга ўтган эди. Улар навбат билан йирик шаҳарларни эгаллаб, август ўртасида Кобулга кирди ва давлат тўлиқ эгаллаб олинганини эълон қилди. Президент Ашраф Ғани БААга қочиб кетди.
Изоҳ (0)