Afg‘oniston hukumati Rossiyadan neft va gaz sotib olmoqchi hamda bu borada muayyan kelishuvlarni tuzmoqchi. Bu haqda Afg‘oniston masalalari bo‘yicha Moskvadagi ishonchli vakil Jamol Nosir Garval “RIA Novosti”ga bergan intervyusida ma’lum qildi.
Foto: “RIA Novosti”
“Biz Afg‘oniston va Rossiya o‘rtasida kelishuvlarga erishishga va muayyan bitimlar tuzishga tayyormiz”, — dedi u.
Diplomatning so‘zlariga ko‘ra, Afg‘oniston Rossiya bilan, shu jumladan, biznesni rivojlantirish masalalari bo‘yicha va moliya sohasida muzokaralar olib bormoqda. “Biz aloqalarimizda progress bo‘lishi uchun Rossiya bilan iqtisodiy hamkorlikni rivojlantirishga tayyormiz va buni juda xohlaymiz”, — dedi Garval, ammo Kobul uchun energiya manbalarini sotib olish masalasi birlamchi ekanini ta’kidladi.
Ishonchli vakil so‘zlariga ko‘ra, Afg‘oniston Rossiya bilan neft va gaz yetkazib berish bo‘yicha “muayyan kelishuvlar imzolash”ga tayyor. Shuningdek, u ilgari TAPI gaz quvuri loyihasini amalga oshirishga xalal bergan xavfsizlikka tahdidlar endi yo‘q ekanini ta’kidladi.
Rossiyaning Ukrainadagi harbiy operatsiyasi tufayli ba’zi mamlakatlar Rossiyaga qarshi misli ko‘rilmagan iqtisodiy sanksiyalar kiritdi va Rossiya zaxiralarini xatladi. Rossiya bunga javob choralarini qo‘llab, xayrixoh bo‘lmagan mamlakatlardan gaz uchun rublda pul to‘lashni talab qildi. Ko‘pchilik Yevropa mamlakatlari bu talabni bajarishdan bosh tortgach, “Gazprom” Polsha va Bolgariyaga gaz uzatishni to‘xtatdi. Hukumat endi bo‘shagan gazni Osiyoga yetkazib berishga yo‘naltirishni rejalashtirmoqda.
Agentlik qayd etishicha, Garval Afg‘onistonning Rossiyadagi vakolatxonasiga rahbarlik qiladi, ammo elchi maqomiga ega emas. Rossiya TIV “Tolibon” hukumatining ilk afg‘on diplomatiga akkreditatsiyani mart oyi oxirida bergan edi.
O‘shanda tashqi ishlar vaziri Sergey Lavrov Vashington va uning ittifoqdoshlari tomonidan bo‘layotgan bosimga qaramasdan, “Tolibon” mamlakatni yaxshi boshqarayotganini aytgandi. Uning so‘zlariga ko‘ra, “Tolibon” terrorchilikka qarshi kurashda muvaffaqiyatga erishgan va inson huquqlariga rioya qilinishini ta’minlash uchun sa’y-harakatlar ko‘rsatgan.
2022-yil fevralida BMT huzuridagi Xalqaro mehnat tashkiloti Afg‘onistondagi vaziyat yomonlashganini ma’lum qildi. Uning ma’lumotlariga ko‘ra, “Tolibon” hokimiyat tepasiga kelganidan buyon qariyb 500 ming afg‘onistonlik o‘z ishini yo‘qotgan.
BMT ma’ruzasiga javoban, Rossiya prezidentining Afg‘oniston bo‘yicha maxsus vakili Zamir Kabulov tashkilot tomonidan berilgan bahoni “qog‘ozga o‘ralgan” deb atadi va aslida vaziyat ancha yomonroq ekanini taxmin qildi. Kabulov ushbu mamlakatdagi ocharchilik haqida ogohlantirdi va BMTning bu sohadagi ma’lumotlari aniq emasligini aytdi.
