Rossiya AQSH bilan madaniyat va OAV sohasida hamkorlik to‘g‘risidagi memorandumni bekor qildi

Rossiya hukumati Tashqi ishlar vazirligining AQSH bilan madaniyat, gumanitar va ijtimoiy fanlar, ta’lim va ommaviy axborot vositalari sohasida hamkorlik tamoyillari to‘g‘risidagi memorandumni bekor qilish tashabbusini ma’qulladi. Tegishli hujjat huquqiy axborot portalida e’lon qilindi.

“1998-yil 2-sentabrda Moskvada imzolangan memorandumning amal qilishini tugatish to‘g‘risidagi Rossiya Tashqi ishlar vazirligining manfaatdor federal ijroiya organlari bilan kelishilgan taklifi qabul qilinsin”, — deyiladi buyruqda.

Hukumat Tashqi ishlar vazirligiga Amerika tomonini ushbu qarordan xabardor qilishni topshirdi.

1998-yilda imzolangan memorandumda Rossiya va AQSH hukumatlarining madaniyat, fan, ta’lim va OAV sohalarida “manfaatdor davlat va nodavlat tashkilotlari” o‘rtasidagi hamkorlikni rivojlantirish, bu sohalarda qo‘shma loyihalar ishlab chiqish, madaniy almashinuvni rivojlantirish va hamkorlikni rag‘batlantirish niyati qayd etilgandi. Shuningdek, rasmiylar rus va ingliz tillarini o‘rganishni, jurnalistlar, nashriyotlar va OAVlar birlashmalari o‘rtasidagi almashinuv va aloqalarni rivojlantirishni rejalashtirgandi.

Rossiyaning Ukrainaga bosqini boshlanganidan ikki kun o‘tib, Massachusets texnologiya instituti (MIT) Skolkovo fan va texnologiya instituti (Skoltex) bilan hamkorlikni to‘xtatganini e’lon qildi. MIT Rossiya rasmiylarining harakatlarini nomaqbul deb atadi va bu qaror “chuqur afsus bilan” qabul qilinganini qayd etdi.

Mart oyi oxirida Buyuk Britaniya “Rossiya universitetlari va Rossiya davlati uchun strategik ahamiyatga ega bo‘lgan kompaniyalar bilan” birgalikda amalga oshirilgan innovatsiyalar sohasidagi loyihalarni moliyalashtirishni to‘xtatdi.

Britaniya hukumati yangi cheklovlarning maqsadini Rossiya hukumati, fuqarolari va Rossiya hukumati bilan bog‘liq tashkilotlarga “salbiy ta’sir ko‘rsatish” deb atagan. Buyuk Britaniya rasmiylari “ziyoni yo‘q” ilmiy manfaatlarga ega rossiyalik tadqiqotchilarga qarshi individual sanksiyalar qo‘llamasligini ta’kidladi.