Россия ҳукумати Ташқи ишлар вазирлигининг АҚШ билан маданият, гуманитар ва ижтимоий фанлар, таълим ва оммавий ахборот воситалари соҳасида ҳамкорлик тамойиллари тўғрисидаги меморандумни бекор қилиш ташаббусини маъқуллади. Тегишли ҳужжат ҳуқуқий ахборот порталида эълон қилинди.
«1998 йил 2 сентябрда Москвада имзоланган меморандумнинг амал қилишини тугатиш тўғрисидаги Россия Ташқи ишлар вазирлигининг манфаатдор федерал ижроия органлари билан келишилган таклифи қабул қилинсин», — дейилади буйруқда.
Ҳукумат Ташқи ишлар вазирлигига Америка томонини ушбу қарордан хабардор қилишни топширди.
1998 йилда имзоланган меморандумда Россия ва АҚШ ҳукуматларининг маданият, фан, таълим ва ОАВ соҳаларида «манфаатдор давлат ва нодавлат ташкилотлари» ўртасидаги ҳамкорликни ривожлантириш, бу соҳаларда қўшма лойиҳалар ишлаб чиқиш, маданий алмашинувни ривожлантириш ва ҳамкорликни рағбатлантириш нияти қайд этилганди. Шунингдек, расмийлар рус ва инглиз тилларини ўрганишни, журналистлар, нашриётлар ва ОАВлар бирлашмалари ўртасидаги алмашинув ва алоқаларни ривожлантиришни режалаштирганди.
Россиянинг Украинага босқини бошланганидан икки кун ўтиб, Массачусетс технология институти (MIT) Сколково фан ва технология институти (Сколтех) билан ҳамкорликни тўхтатганини эълон қилди. MIT Россия расмийларининг ҳаракатларини номақбул деб атади ва бу қарор «чуқур афсус билан» қабул қилинганини қайд этди.
Март ойи охирида Буюк Британия «Россия университетлари ва Россия давлати учун стратегик аҳамиятга эга бўлган компаниялар билан» биргаликда амалга оширилган инновациялар соҳасидаги лойиҳаларни молиялаштиришни тўхтатди.
Британия ҳукумати янги чекловларнинг мақсадини Россия ҳукумати, фуқаролари ва Россия ҳукумати билан боғлиқ ташкилотларга «салбий таъсир кўрсатиш» деб атаган. Буюк Британия расмийлари «зиёни йўқ» илмий манфаатларга эга россиялик тадқиқотчиларга қарши индивидуал санкциялар қўлламаслигини таъкидлади.
Изоҳ (0)