Истеъмол бозорида сотилаётган ёпган нонлар импорт ундан ёпилгани учун қимматлашмоқда. Бу ҳақда Молия вазирлиги департаменти мудири Тўлқин Мирзаев «Дарё» мухбирига берган интервьюсида маълум қилди.
Тўлқин Мирзаевнинг таъкидлашича, ижтимоий тармоқларда ёпган нонни нархи ошиб кетишига ғаллани сотишда бозор тамойилини жорий этишга доир президент қарори сабаб бўлгани ҳақида хабарлар тарқалган.
«Ижтимоий тармоқларда ёпган нон нархи ошиб кетди, бунга шу қарорнинг қабул қилиниши сабаб бўлди, деган хабарлар юрибди. Бу гапларнинг ҳаммаси асоссиз. Чунки истеъмол бозорида сотилаётган ёпган ноннинг барча турлари импорт қилинган ундан ёпилади. Шу сабабли бу қарорнинг ёпган нонга ҳеч қандай алоқаси йўқ. Мазкур нонларнинг асосий хом ашёси, асосан, Қозоғистон ва бошқа мамлакатлардан импорт қилинган ундир. Бундай миш-мишлар тарқалишига айрим ноинсоф тадбиркорларнинг халқимизга нисбатан бўлган нотўғри ҳаракати сабаб бўлган деб биламан. Биз бу бўйича қисқа муддатда ўрганишлар ўтказамиз ва тегишли чоралар кўрилади», — деди вазирлик вакили.
Аввалроқ «Ғаллани етиштириш ва сотишда бозор тамойилини жорий этишнинг қўшимча чора-тадбирлари тўғрисида»ги президент қарори қабул қилинганди.
Изоҳ (0)