Эмомали Раҳмон икки кунлик расмий ташриф билан Ўзбекистонда бўлиши кутилмоқда. Бу ҳақда Тожикистон президенти матбуот хизматига таяниб, Asia-Plus хабар берди.
Қайд этилишича, 2—3 июнь кунларига режалаштирилган ташриф доирасида Имомали Раҳмоннинг Ўзбекистон олий раҳбарияти билан расмий учрашувлар ўтказилиши, унинг якунлари бўйича бир қатор ҳужжатлар имзоланиши кутилмоқда.
Бўлажак учрашувлар кун тартибидан мамлакатлар ўртасидаги савдо-иқтисодий, транспорт-коммуникация ва маданий-гуманитар соҳалардаги ҳамкорликни ривожлантириш масалалари ўрин олган.
Эмомали Раҳмоннинг Ўзбекистонга кутилаётган расмий ташрифи муносабати билан «Ховар» агентлиги Тожикистоннинг Ўзбекистондаги элчиси Абдужаббор Раҳмонзоданинг мақоласини эълон қилган. Унда айтилишича, президентнинг Тошкентга ташрифи доирасида ишбилармонлик учрашувлари, инвестициявий форум, минтақавий илмий-амалий анжуман ва қатор маданий тадбирлар ҳам режалаштирилган.
«Дунё» ахборот агентлигининг хабар беришича, 30 май куни Душанбеда бўлиб ўтган Савдо-иқтисодий ҳамкорлик бўйича Ўзбекистон—Тожикистон ҳукуматлараро комиссиясининг навбатдаги мажлисида ҳам Эмомали Раҳмоннинг Ўзбекистонга ташрифи муҳокама қилинган.
Унда таъкидланишича, Тожикистон президентининг Ўзбекистонга бўлажак расмий ташрифи давлатлари ўртасида стратегик шерикликни янада мустаҳкамлашда катта тарихий аҳамиятга эга бўлади. Мажлисда ушбу ташриф кун тартибини аниқ амалий мазмун билан тўлдириш, режалаштирилган барча тадбирларни юқори савияда амалга ошириш масалаларига алоҳида эътибор қаратилган.
Шавкат Мирзиёев ва Эмомали Раҳмон сўнгги марта 4 май куни телефон орқали мулоқот қилган эди. Ўшанда давлат раҳбари Тожикистон президентини қулай вақтда Ўзбекистонга расмий ташриф билан келишга таклиф қилган.
Изоҳ (0)