Prezident Shavkat Mirziyoyev 25-may kuni “Aholining ijtimoiy himoyaga muhtoj qatlamlarini manzilli qo‘llab-quvvatlashga oid qo‘shimcha chora-tadbirlar to‘g‘risida”gi qarorni imzoladi. “Daryo” muxbiri Mirolim Isajonov mazkur qarorga oid bir qancha savollar bilan Moliya vaziri o‘rinbosari Jamshid Abro‘yevga yuzlandi.
— Bir martalik moddiy yordam pullarini tarqatish jarayoni qanday kechmoqda?
— Davlat rahbarining qaroriga asosan Qoraqalpog‘iston Respublikasi va viloyatlarda yashovchi pensiya va nafaqa oluvchilarning har biriga 300 ming so‘mdan, Toshkent shahrida yashovchi fuqarolarga esa 400 ming so‘mdan moddiy yordam ko‘rsatilmoqda. Mazkur toifadagi fuqarolarning umumiy soni 4,3 million nafarni tashkil etadi.
“Ijtimoiy himoya yagona reyestri” axborot tizimiga 1,9 million oila kiritilgan. Mazkur oilalarda 18 yoshga to‘lmagan 4,5 million nafar bola yashaydi. Kam ta’minlangan sifatida moddiy yordam oluvchi oilalarga hamda kam ta’minlangan sifatida bolalar nafaqasini oluvchi oilalarning har bir 18 yoshgacha bo‘lgan bolasiga – 200 ming so‘mdan bir martalik pul beriladi.
Qarorga muvofiq, bir nechta toifa bo‘yicha bir martalik moddiy yordam olish huquqiga ega bo‘lgan shaxslarga yordam har bir toifa bo‘yicha to‘lab beriladi.
Ushbu mablag‘lar plastik kartalari orqali pensiya va nafaqa oluvchi fuqarolarning barchasiga tushirib berildi. Naqd pul oluvchilarga esa grafik bo‘yicha Xalq banki vakillari tomonidan tarqatiladi. Shanba—yakshanba kunlari ham tarqatildi. Bu bo‘yicha hech qanday muammo bo‘lmasligi kerak. Mazkur jarayon shu yilning 8-iyuniga qadar yakunlanadi.
— Prezident qarorida 20 kilogrammdan un tarqatish haqida ham qayd etilgan. Bu mahsulot kimlarga beriladi?
— 35 million aholidan salkam 9 million nafariga bir martalik moddiy yordam ko‘rsatilyapti. Past daromadli, ehtiyojmand oilalarning deyarli barchasi qamrab olinmoqda. Mana shu toifaga kirmay qolganlar, “temir daftar”ga kirgan-u, lekin qandaydir sabablar bilan (masalan, oilada nafaqa oluvchi yoki pensioner bo‘lmasligi mumkin) bir martalik pul olmagan fuqarolar ro‘yxati shakllantiriladi. So‘ngra ularning har biriga 20 kilogrammdan un tarqatiladi.
Kuni kecha Bosh vazir yig‘ilishida Toshkent shahri aholisiga unning bozor narxidagi pulini tarqatish to‘g‘risida tavsiya berildi. Chunki poytaxtda yashovchi aholining deyarli barchasi non sotib oladi, ko‘pchilikda uyda non qilish imkoniyati yo‘q. Lekin fuqarolarning istagiga ko‘ra, pul yoki un tarqatiladi.
Mavzuga doir:
Izoh (0)