Bank kreditlaridan foydalanib uy-joy sotib olish yoki ta’mirlash mumkin. Bu qanday amalga oshirilishi haqida Markaziy bankning FinLit loyihasi xabar berdi.
“Ipotekani qayta moliyalashtirish kompaniyasi” resurslari hisobidan ajratiladigan kredit evaziga bunday rejalarni amalga oshirish mumkin.
Buning uchun kredit olish istagidagi shaxs nomida boshqa ipoteka krediti mavjud bo‘lmasligi, u 18 yoshga to‘lgan va doimiy daromadga ega bo‘lishi kerak.
Kredit summasi cheklanganmi va shartlari qanday?
Uy-joy sotib olishda kreditning maksimal miqdori 400 mln so‘mgacha ya’ni uy to‘lovining 74 foizigacha bo‘ladi.
Bunda boshlang‘ich badal uy narxining 26 foizidan kam bo‘lmagan miqdorda to‘lanishi kerak. Kredit muddati 240 oygacha, foizi esa yillik 17, 5 foiz.
Uy ta’mirlashda beriladigan kreditning maksimal miqdori 80 mln so‘mgacha bo‘lib, u boshlang‘ich badalsiz bo‘ladi. Kredit muddati 120 oygacha, foizi esa yillik 16,5 foiz:
Bunday kredit olish uchun mijozning kredit tarixi ijobiy bo‘lishi kerak, ya’ni boshqa kreditlari bo‘yicha to‘lovni o‘z vaqtida amalga oshirgan va muddati o‘tgan joriy qarzdorligi bo‘lmasligi talab etiladi.
Agar qarz oluvchining oylik daromadi kredit to‘lovlarini qoplashga yetmasa-chi?
Agar qarz oluvchining oylik daromadi kredit to‘lovlariga yetmasa, u o‘zi bilan yashayotgan doimiy daromadga ega yaqin qarindoshlarini sherik qarzdor qilishi mumkin. Bunda ular ham teng miqdorda kredit to‘lovlari bo‘yicha javobgar bo‘ladi.
Faqat umumiy qarz oluvchilarning jami o‘rtacha oylik daromadi 15 mln so‘mdan oshmasligi kerak.
Kerakli hujjatlar
- ariza
- pasport nusxasi (qarzdor va birgalikda qarz oluvchilar);
- daromadlar to‘g‘risida ma’lumotnoma (qarzdor va birgalikda qarz oluvchilar).
Ta’mirlash uchun ipoteka krediti pudrat qurilish tashkilotining hisobvarag‘iga yoki qurilish materiallari sotuvchi korxonaning hisobvarag‘iga pul o‘tkazish yo‘li bilan amalga oshiriladi.
Ushbu kreditlarni qaysi banklardan olish mumkin?
“Ipotekani qayta moliyalashtirish kompaniyasi” resurslari hisobidan “Ipoteka bank”, “Sanoat qurilish bank”, “Asaka bank”, “Qishloq qurilish bank”, “Turon bank”, “Agrobank”, “Hamkorbank” va “Xalq banki” ipoteka kreditlarini ajratadi.
Avvalroq O‘zbekistonda aholining qaysi qatlamiga ko‘proq ipoteka krediti berilgani ma’lum bo‘lgani haqida xabar berilgan edi.
Izoh (0)