Банк кредитларидан фойдаланиб уй-жой сотиб олиш ёки таъмирлаш мумкин. Бу қандай амалга оширилиши ҳақида Марказий банкнинг FinLit лойиҳаси хабар берди.
«Ипотекани қайта молиялаштириш компанияси» ресурслари ҳисобидан ажратиладиган кредит эвазига бундай режаларни амалга ошириш мумкин.
Бунинг учун кредит олиш истагидаги шахс номида бошқа ипотека кредити мавжуд бўлмаслиги, у 18 ёшга тўлган ва доимий даромадга эга бўлиши керак.
Кредит суммаси чекланганми ва шартлари қандай?
Уй-жой сотиб олишда кредитнинг максимал миқдори 400 млн сўмгача яъни уй тўловининг 74 фоизигача бўлади.
Бунда бошланғич бадал уй нархининг 26 фоизидан кам бўлмаган миқдорда тўланиши керак. Кредит муддати 240 ойгача, фоизи эса йиллик 17, 5 фоиз.
Уй таъмирлашда бериладиган кредитнинг максимал миқдори 80 млн сўмгача бўлиб, у бошланғич бадалсиз бўлади. Кредит муддати 120 ойгача, фоизи эса йиллик 16,5 фоиз:
Бундай кредит олиш учун мижознинг кредит тарихи ижобий бўлиши керак, яъни бошқа кредитлари бўйича тўловни ўз вақтида амалга оширган ва муддати ўтган жорий қарздорлиги бўлмаслиги талаб этилади.
Агар қарз олувчининг ойлик даромади кредит тўловларини қоплашга етмаса-чи?
Агар қарз олувчининг ойлик даромади кредит тўловларига етмаса, у ўзи билан яшаётган доимий даромадга эга яқин қариндошларини шерик қарздор қилиши мумкин. Бунда улар ҳам тенг миқдорда кредит тўловлари бўйича жавобгар бўлади.
Фақат умумий қарз олувчиларнинг жами ўртача ойлик даромади 15 млн сўмдан ошмаслиги керак.
Керакли ҳужжатлар
- ариза
- паспорт нусхаси (қарздор ва биргаликда қарз олувчилар);
- даромадлар тўғрисида маълумотнома (қарздор ва биргаликда қарз олувчилар).
Таъмирлаш учун ипотека кредити пудрат қурилиш ташкилотининг ҳисобварағига ёки қурилиш материаллари сотувчи корхонанинг ҳисобварағига пул ўтказиш йўли билан амалга оширилади.
Ушбу кредитларни қайси банклардан олиш мумкин?
«Ипотекани қайта молиялаштириш компанияси» ресурслари ҳисобидан «Ипотека банк», «Саноат қурилиш банк», «Асака банк», «Қишлоқ қурилиш банк», «Турон банк», «Агробанк», «Ҳамкорбанк» ва «Халқ банки» ипотека кредитларини ажратади.
Аввалроқ Ўзбекистонда аҳолининг қайси қатламига кўпроқ ипотека кредити берилгани маълум бўлгани ҳақида хабар берилган эди.
Изоҳ (0)