Jizzaxda maktabda o‘qiydigan qizlar boshqa bir qizni “samosud” qilgani to‘g‘risida xabar berilgandi. “Milliy” telekanalining “Millar” informatsion dasturida ma’lum qilinishicha, o‘quvchilarning ota-onalari javobgarlikka tortilgan.
Ijtimoiy tarmoqlarda tarqalgan videoda bir nechta o‘quvchi qizlar boshqa bir qizni o‘rtaga olib, kechirim so‘rashga majburlagani tasvirlangan. O‘rganishlar davomida ushbu holat haftaning yakshanba kuni sodir etilgani ma’lum bo‘lgan. Mazkur janjalda o‘rta maxsus ta’lim kasb-hunar boshqarmasiga qarashli kasb-hunar maktabidan bir nafar voyaga yetmagan shaxs, beshta maktabning 6 nafar o‘quvchisi hamda ikki nafar voyaga yetgan shaxslar ishtirok etgan.
Aniqlanishicha, janjalga Instagram’dagi o‘zaro haqoratli yozishmalar sabab bo‘lgan. XTV vakilining so‘zlariga ko‘ra, ushbu jarayonda ishtirok etgan o‘quvchilarning ota-onalari Ma’muriy javobgarlik to‘g‘risidagi kodeksning 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik) bilan javobgarlikka tortilgan.
Avvalroq Qoraqalpog‘istonda bir guruh ayollar boshqa bir ayolni “samosud” qilgani, Surxondaryoda kundoshini “samosud” qilgan ayol va uning opasi qamalgani to‘g‘risida xabar berilgandi.
Izoh (0)