Samarqand viloyati Ishtixon tumanida 22-may kuni avtobus va yuk mashinasi o‘rtasida to‘qnashuv sodir bo‘ldi. Bu haqda viloyat Ichki ishlar boshqarmasi xabar qildi.
Qayd etilishicha, holat shu kuni tungi soat 1 larda Ishtixon tumani “Xalqobod” mahallasidan o‘tuvchi M37 avtomobil yo‘lida sodir bo‘lgan. Buxoro—Samarqand yo‘nalishida harakatlanayotgan Zhongtong xorijiy sayyohlar avtobusi va “KamAZ” yuk mashinasi to‘qnashib ketgan.
Oqibatda avtobus salonida bo‘lgan yo‘lovchi olgan tan jarohatlari bilan voqea joyida vafot etgan. Yana bir yo‘lovchi — Ruminiya fuqarosi esa yengil tan jarohati olgan.
Dastlabki tekshiruvlarda YTHga haydovchilardan birining rul boshqaruvida uxlab qolgani sabab bo‘lgani aniqlangan.
Avvalroq Urganchda avtobus ishtirokidagi YTHda 2 kishi vafot etgani, Qibrayda ikki yo‘lovchi avtobus poyga o‘ynashi oqibatida ulardan biri Lacetti bilan to‘qnashib ketgani, Surxondaryoda qarama-qarshi yo‘nalishdagi “KamAZ” bilan to‘qnashgan Cobalt haydovchisi halok bo‘lgani haqida xabar berilgan.
Izoh (0)