Roberto Karlos 49, Raul esa 44 yoshda. “Real”ning 90-yillardagi yulduzlari hozir qayerda va qanday ko‘rinishga ega? (foto)

O‘tgan asrning 90-yillari oxirlarida Roberto Karlos, Fernando Yerro, Ugo Sanches, Raul, Manuel Sanchis kabi nomlar Ispaniya va Yevropa maydonlarida “Real”ga ko‘plab g‘alabalar va sovrinlar olib kelardi. Oradan o‘ttiz yil o‘tdi va juda ko‘p narsalar o‘zgardi. Quyida “Santyago Bernabeu” afsonalari hozir qayerdaligi va nima bilan shug‘ullanayotgani haqida so‘z yuritiladi, shu bilan birga ularning hozirgi tashqi ko‘rinishi qanday degan savolga ham javob beriladi.

Emilio Butragenyo, 58 yosh

Butragenyo “Real” safida 12 mavsum o‘tkazgan, muxlislar esa unga “kalxat” laqabini bergan. Emilio Ispaniyada qo‘lga kiritish mumkin bo‘lgan barcha sovrinlarga ega chiqqan, ammo faqat bir marta — 1991-yilda Primeraning eng yaxshi to‘purari (19 ta gol bilan) bo‘lgan. Taniqli to‘purar ayni damda “qirollik klubi” boshqaruv tizimida faoliyat ko‘rsatadi.

Ugo Sanches, 63 yosh

Sanches “qirollik klubi”ga 27 yoshida “Atletiko”dan ko‘chib o‘tgan va buning uchun “Visente Kalderon”ning nafratiga uchragan. Biroq uning o‘zi bu transferdan afsuslanishiga hech qanday asos yo‘q. Madriddagi yetti yil davomida meksikalik hujumchi 250 dan ortiq uchrashuv o‘tkazib, 190 ta gol uradi, besh marta Ispaniya chempionati to‘purari bo‘ladi va bir bor Yevropada “Oltin butsi”ni o‘ziniki qiladi. Sanches La Liga tarixidagi eng yaxshi to‘purarlar orasida kuchli to‘rtlikka kiradi (Messi, Ronaldu va Telmo Sarradan keyin). Sanches hozir bir-yo‘la ikki davlatda — Meksika va Ispaniyada istiqomat qiladi va ko‘p vaqtini oilasiga bag‘ishlaydi.

Manuel Sanchis, 57 yosh

Sanchis Madrid klubi tarbiyalanuvchisi bo‘lib, futboldagi fidoyilik timsoli hisoblanadi. U butun faoliyatini “Real”da o‘tkazgan. Manuel 18 yil davomida 655 ta o‘yinda qatnashib, 37 ta golni o‘z nomiga yozdirib qo‘ygan. Afsonaviy Sanchis 13 mavsum davomida “qaymoqranglilar”ga sardorlik qilib, qo‘lga kiritish mumkin bo‘lgan hamma sovrinlarni yutadi. Faoliyatini yakunlaganidan keyin Sanchis futboldan uzoqlashdi va kamdan-kam hollarda omma oldida ko‘rinish bermoqda.

Fernando Yerro, 54 yosh

Ispaniya terma jamoasining bo‘lajak sardori 1989-yilda “Valyadolid”dan Madridga ko‘chib o‘tgan. Fernando “Real”da La Liga tarixidagi eng sermahsul himoyachilardan biri sifatida shuhrat qozondi. 15 mavsum va 587 o‘yinda Yerro 124 gol urgan. Kuchli zarbasi va ikkinchi qavatdagi ajoyib o‘yini Fernandoga muntazam ravishda hujumlarga qo‘shilishga imkon yaratadi. 1991/92-yilgi mavsumda esa 21 ta gol bilan mavsumni yakunlagan, o‘shanda u bir o‘yinda poker qilishga muvaffaq bo‘lgandi. 2018- yilgi Jahon Chempionati boshlanishiga bir kun qolganida kutilmaganda (ehtimol, o‘zi uchun ham shundaydir) Ispaniya terma jamoasiga bosh murabbiy etib tayinlanadi. O‘sha vaqtda u Ispaniya futbol federatsiyasida milliy terma jamoa sport direktori lavozimida faoliyat olib borardi. U terma jamoa boshqaruvida Xulen Lopetegining o‘rnini egallaydi. Biroq Yerro bu kursida bor-yo‘g‘i bir oy ishlaydi, xolos. Mundialdan so‘ng Yerro terma jamoadan ketadi. Shundan keyin u hali biror joyda ishlagani yo‘q.

Ivan Samorano, 55 yosh

Ivan Samorano faoliyati davomida beshta davlatda o‘ynagan, ammo aynan Ispaniyada katta muvaffaqiyatga erishgan. U “Real” bilan birgalikda 1993-yilda Ispaniya Kubogi va Superkubogini qo‘lga kiritgan, 1994/95-yilgi mavsumda esa mamlakat chempionatida zafar quchgan. Madridliklar safida 100 ta golga erishish uchun chililik futbolchiga atigi 3 ta gol yetmay qolgan. Hozirda Samorano dam olish bilan ovora, vaqti-vaqti bilan esa turli tadbirlarda ko‘rinish berib turadi.

Fernando Redondo, 52 yosh

Redondoning Madriddagi faoliyati 1994-yilda boshlangan. Sobiq yarim himoyachi “Real” bilan ikki marta Chempionlar Ligasida g‘olib chiqqan, uning 22 yil avval “Manchester Yunayted”ga qarshi o‘yinda amalga oshirgan finti esa jahon futbolining durdonasi hisoblanadi. Argentinalik faoliyatini yakunlagach, omma e’tiboridan yo‘qoldi va tinch hayot tarzini tanladi.

Madridda o‘tgan 11 mavsumda braziliyalik futbolchi 527 ta o‘yinda maydonga tushib, 69 ta gol urgan, 89 ta golga assistentlik qilgan va 13 ta sovrinni qo‘lga kiritgan. Dunyodagi eng kuchli zarbalardan birining egasi bo‘lgan Roberto Karlos UEFA talqiniga ko‘ra ikki marta Yevropaning eng yaxshi himoyachisi deb topilgan. Butsilarini mixga ilgan Roberto dastlab o‘zini murabbiylikda sinab ko‘rdi, ammo hozircha hech narsaga erisha olganicha yo‘q. Ammo “Real”ning eshiklari u uchun doim ochiq — hozirda Roberto klub tizimidagi ma’muriy lavozimlardan birida faoliyat yuritmoqda. Bundan tashqari, u muntazam ravishda xayriya tadbirlari bilan shug‘ullanadi.

Predrag Miyatovich, 51 yosh

Miyatovich “Real” safida atigi 3 mavsum o‘ynagan, ammo shu uncha katta bo‘lmagan muddat unga o‘z nomini klub tarixiga yozib qo‘yish uchun yetarli bo‘lgan. Buning uchun faqat bitta aniq zarba berish kifoya edi — uning 1997/98-yilgi Chempionlar Ligasi finalida “Yuventus”ga urgan goli Madridga “shalpangquloq”ni taqdim etgan. Yugoslaviya terma jamoasining sobiq futbolchisi hozirda agentlik faoliyati bilan shug‘ullanmoqda.

Davor Shuker, 54 yosh

Shuker “Real”ga yetuk va ancha tajribali futbolchi sifatida kelgan. “Qirollik klubi”dagi uch mavsumda Davor 111 ta o‘yin o‘tkazib, 49 ta gol urgan. Sovrinlar qatorida Ispaniya chempionati, mamlakat Superkubogi va UEFA Chempionlar Ligasi bosh sovrinlari bor. Shuker 2012-yildan 2021-yilgacha Xorvatiya futbol assotsiatsiyasini boshqargan.

Klarens Zeyedorf, 46 yosh

Zeyedorf Madrid klubiga 20 yoshli yigitcha bo‘lib kelib, u yerni tajribali va yetuk o‘yinchi sifatida tark etadi, Klarens “qirollik klubi”dan ketish chog‘ida o‘z pozitsiyasida dunyodagi eng yaxshilardan biri edi. 1996-yildan 2000-yilgacha niderlandiyalik futbolchi “Real” bilan to‘rtta sovrinni qo‘lga kiritgan — ikkitadan milliy va xalqaro maydonda. Ular orasida, albatta, Chempionlar Ligasi alohida ajralib turadi. Zeyedorf 2018-yil avgustidan 2019-yilning iyuligacha Kamerun terma jamoasiga murabbiylik qilgan. Hozirda u ishsiz.

Raul, 44 yosh

17 yoshidayoq “Real” bilan professional shartnoma imzolagan Raul “Bernabeu”ning ramzlaridan biridir. “Madrid qiroli” nomining berilishi ham uning klub uchun nimani anglatishini yaxshi ifodalaydi. Ispaniya poytaxtida tug‘ilgan futbolchi “qirollik klubi” tarkibida eng ko‘p o‘yin o‘tkazgan (741 ta), to‘purarlar ro‘yxatida esa ikkinchi o‘rinda (323), bugungi kunda Madridni “yondirayotgan” Karim Benzemaning hisobida ham shuncha gol bor. Raul 16 yil davomida “qaymoqranglilar” bilan 16 ta sovrinni qo‘lga kiritgan. Afsonaviy forvard hozirda “Real”ning o‘rinbosarlar jamoasini boshqarmoqda va o‘ziga xos yutuqlarga erishib kelmoqda. Agar yaqin yillar ichida u asosiy jamoaga o‘tadigan bo‘lsa, bu hech kimni ajablantirmaydi.