O‘zbekiston qilichbozlik federatsiyasining navbatdan tashqari hisobot-saylov konferensiyasi 27-may, juma kuni bo‘lib o‘tdi.
Unda federatsiyaga yangi rahbar saylash kun tartibidagi asosiy masala sifatida ko‘rib chiqildi. Yig‘ilishda O‘zbekiston qilichbozlik federatsiyasi raisi lavozimiga Maqsud Abdusamatov nomzodi bir ovozdan saylandi.
Abdusamatov ayni vaqtda “Kapitalbank” ATB Kuzatuv kengashi raisi sifatida ham faoliyat olib boryapti.
2018-yilning noyabr oyidan buyon O‘zbekiston qilichbozlik federatsiyasi raisi lavozimida ishlab kelayotgan Rustam Shoabdurahmonov o‘z arizasiga ko‘ra ishdan ketgan. Shuningdek, shu kunga qadar O‘zbekiston qilichbozlik federatsiyasiga bosh kotib vazifasida faoliyat ko‘rsatib kelgan Gulnora Saidova mazkur lavozimga qayta saylangan.
2019-yilning may oyida Milliy Olimpiya qo‘mitasiga rais etib saylangan Rustam Shoabdurahmonov 2022-yilning fevralida mazkur lavozimdan ketgandi.
Maqsud Abdusamatov 1994-yildan bank sohasidagi faoliyati boshlagan. Abdusamatov quyidagi lavozimlarda faoliyat olib borgan: “O‘zprivatbank” g‘aznachilik departamenti direktori (1998—1999), “Biznes Bank” XATB boshqaruv raisi (2000—2003), “Kapitalbank” ATB boshqaruv raisi (2004—2011).
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)