Коррупцияга оид жиноятлар содир қилиш бўйича Андижон вилояти ўтган 3 ойда республика миқёсида энг юқори ўринларни эгаллади. Бу ҳақда Коррупцияга қарши курашиш агентлиги хабар берди.
Маълум қилинишича, коррупцияга оид жиноятлар содир қилиш бўйича Андижон вилояти ўтган 3 ойда энг юқори ўринларни эгаллаган. Ўзбекистон президенти виртуал қабулхонаси ва Халқ қабулхоналарига аҳолиси коррупция бўйича энг кўп мурожаат қиладиган ҳудудлар ичида республикада 1-ўринни банд этмоқда.
Вилоят Коррупцияга қарши ҳудудий кенгашининг навбатдаги йиғилишида коррупцияга қарши курашиш ва унинг олдини олиш тизимини тубдан қайта кўриб чиқиш кераклиги муҳокама қилинган.
Таҳлилларга кўра, 2021 йилда 22 нафар шахсга нисбатан 18 та жиноят иши судга юборилган. Улар ўзлаштириш, фирибгарлик, мансаб ваколатини суиистеъмол қилиш ҳамда пора олиш каби жиноятларни содир қилган. Мазкур жиноятларга қўл урганларнинг 4 нафари вилоят ҳокимлиги, 18 нафари туман ва шаҳар ҳокимликларининг ходимлари ҳисобланади.
«Бир ойдан сўнг 2022 йилнинг биринчи ярим йиллиги бўйича ҳудудлар худди шундай баҳоланади ва барча натижалар оммавий ахборот воситаларида эълон қилиниб, Миллий кенгаш йиғилишида муҳокама қилинади. Лекин бу даврда ҳам вилоят ҳудудий кенгаши томонидан ижобий натижа кўрсатиш учун арзирли амалий иш ёки ташаббусни кўрмаяпмиз. Кенгаш аъзолари коррупцияга қарши курашиш борасида аъзо сифатидаги масъулиятни қанчалик ҳис қилмоқда, вилоятда, ўз тизимида коррупцияни камайтириш учун қай даражада ҳаракат қилмоқда – бу каби саволларни кенгашнинг ҳар бир аъзоси ўзига қайта ва қайта бериши керак, деб ўйлайман», — деди Коррупцияга қарши курашиш агентлиги директори ўринбосари Умида Тўхташева.
Аввалроқ Антикоррупция агентлиги очиқликка оид қонунчилик талабларига риоя этмаган 8 та маҳаллий ҳокимликка огоҳлантириш юборгани, Ўзбекистонда 1 сентябрдан «E-antikorrupsiya» лойиҳаси ишга туширилиши тўғрисида хабар берилганди.
Изоҳ (0)