Lugansk Xalq Respublikasi hududining qariyb 95 foizi LXR xalq militsiyasi nazoratida. Bu haqda respublika rahbari Leonid Pasechnikga tayanib, “Interfaks” xabar berdi.
“Bugungi kunda LXR hududining deyarli 95 foizi ozod qilingan”, — dedi Pasechnik 26-may kuni “Yagona Rossiya” siyosiy partiyasining “Donbass va ozod qilingan hududlar bilan iqtisodiy integratsiya” forumi muhokama maydonida.
25-may kuni LXR xalq militsiyasi vakili Andrey Marochko Lisichansk va Severodonetsk shaharlari tezkor qamalda ekani, LXR va Rossiyaning ittifoqchi kuchlari shaharlarni uch tomondan to‘sib qo‘yib, Ukraina armiyasining logistikasini nazorat qilayotganini aytgandi.
Eslatib o‘tamiz, 21-fevral kuni Rossiya prezidenti Vladimir Putin Donetsk va Lugansk xalq respublikalarining mustaqilligini tan olish haqidagi farmonni imzolagan. 24-fevral kuni esa Putin Ukrainada “maxsus harbiy operatsiya” boshlanganini e’lon qildi. G‘arb Rossiyaga keng ko‘lamli sanksiyalar bilan javob qaytardi va Ukrainaga qurol-yarog‘ bilan yordam berishni boshladi.
Izoh (0)