Нью-Йоркда қурол ишлаб чиқарувчиларини судга бериш мумкин бўлди

Нью-Йоркда федерал суд қурол ишлаб чиқарувчиларга қарши даъво киритишга рухсат берди, деб ёзади «РИА Новости».

Нью-Йорк федерал суди чиқарган қарорга мувофиқ, отишма билан боғлиқ ҳодисаларга алоқадорликда тахмин қилиб, ўқотар қуроллар ишлаб чиқарувчиларига қарши суд даъволарини бериш мумкин бўлди.

«Федерал суди идорамнинг қурол ишлаб чиқарувчиларини қурол томонидан етказилаётган вайронкор оқибатлар туфайли жавобгарликка тортиш ҳуқуқини тасдиқлагани катта ғалабамиз бўлди», — деб ёзди штат бош прокурори Летиция Жеймс ўз Twitter’ида.

Унинг сўзларига кўра, АҚШ ҳукумати «ўқотар қурол иштирокидаги зўравонликка нуқта қўйиб, ушбу ўлим ва вайронкорлик қуроли учун масъул бўлган қудратли кучларга қарши туриш» учун қўл остидаги барча воситаларни ишга солиши керак.

Нью-Йорк суди қарори Техас штати Ювалд шаҳридаги бошланғич мактаблардан бирида содир этилган отишма фонида чиқарилди. Унинг оқибатида 21 киши ҳалок бўлиб, яна камида 17 киши яраланган эди.

АҚШ президенти Жо Байден отишмадан кейин конгрессга йўллаган мурожаатида қурол лоббисига қарши курашиб, қурол бўйича қонунчиликка қўшимча чекловлар киритиш зарурлигини айтди.

«Мамлакат сифатида биз қачон қурол лоббисига қарши чиқамиз, деб сўрашимиз керак. Мен бундан чарчадим. Биз ҳаракатга ўтишимиз керак. Биз бу қирғинга таъсир қила олмаймиз деб менга айтманг», — деди Байден.

Associated Press қайд этишича, Ювалддаги отишма қурбонлар сони бўйича сўнгги ўн йилдаги энг оммавийси бўлди. 2012 йил 14 декабрь куни Коннектикут штатидаги Сенди-Хук мактабида юз берган отишмада 20 нафар бола ва олти нафар катта ёшлилар ҳалок бўлганди.