AQSH maktabida otishma sodir etgan shaxs hujum haqida Facebook orqali ogohlantirgan

Texasdagi boshlang‘ich maktabda 19 nafar bolani va ikki o‘qituvchini otib o‘ldirgan o‘qotar hujumdan bir necha daqiqa avvalroq Facebook orqali o‘z niyati haqida ogohlantirgan, deb yozadi Reuters.

Bu haqda Texas gubernatori Greg Ebbott ma’lum qildi. 18 yoshli Salvador Ramos, shuningdek, buvisini otib tashlash rejasi haqida xabar yuborgan va buni amalga oshirgani haqida ham yozgan.

Nevarasi tomonidan boshidan otilgan 66 yoshli Seliya Gonsales tirik qolgan va politsiya chaqirishga ulgurgan. Ayni paytda u kasalxonada. Uning qizi, Ramosning onasi Adriana Reyes o‘g‘li tomonidan uyushtirilgan otishmadan hayratda qolganini bildirdi.

“O‘g‘lim agressiv odam emasdi. Uning qilmishidan hayratga tushdim”, — dedi u jurnalistlarga.

Ramos o‘rta maktabni tugatmagan. U politsiyaga tushmagan va ruhiy xasta ham bo‘lmagan.

Yigit maktab yaqiniga kelib, mashinasini urib olgan, politsiyachini ko‘rgach, o‘q-dorilar solingan sumkasini tushirib yuborib, maktab tomonga qarab qochgan. Orqa eshikdan bino ichiga kirgan. Uning qo‘lida AR-15 miltig‘i bo‘lgan, ammo o‘sha payti otishma bo‘lmagan.

Politsiya maktabni qurshab olgan, bolalar va xodimlar chiqib ketishi uchun derazalarni sindirgan.

Hukumat ma’lumotlariga ko‘ra, Ramos otishmadan bir necha kun avval qonuniy ravishda ikkita miltiq va 375 ta patron sotib olgan.

Ayni paytda Facebook kompaniyasi tergov bilan hamkorlik qilmoqda.

Maktabdagi otishma haqida ilk xabarlar mahalliy vaqt bilan 24-may kuni 11:43 da (Toshkent vaqti bilan 21:43) kelib tushgandi. Hujumchi 18 yoshli yigit bo‘lib chiqdi, u politsiyachilar tomonidan qo‘lga olinish chog‘ida halok bo‘ldi.

Associated Press qayd etishicha, Yuvalddagi otishma qurbonlar soni bo‘yicha so‘nggi o‘n yildagi eng ommaviysi bo‘ldi. 2012-yil 14-dekabr kuni Konnektikut shtatidagi Sendi-Xuk maktabida yuz bergan otishmada 20 nafar bola va olti nafar katta yoshlilar halok bo‘lgandi.