АҚШ мактабида отишма содир этган шахс ҳужум ҳақида Facebook орқали огоҳлантирган

Техасдаги бошланғич мактабда 19 нафар болани ва икки ўқитувчини отиб ўлдирган ўқотар ҳужумдан бир неча дақиқа аввалроқ Facebook орқали ўз нияти ҳақида огоҳлантирган, деб ёзади Reuters.

Бу ҳақда Техас губернатори Грег Эбботт маълум қилди. 18 ёшли Салвадор Рамос, шунингдек, бувисини отиб ташлаш режаси ҳақида хабар юборган ва буни амалга оширгани ҳақида ҳам ёзган.

Невараси томонидан бошидан отилган 66 ёшли Селия Гонсалес тирик қолган ва полиция чақиришга улгурган. Айни пайтда у касалхонада. Унинг қизи, Рамоснинг онаси Адриана Реес ўғли томонидан уюштирилган отишмадан ҳайратда қолганини билдирди.

«Ўғлим агрессив одам эмасди. Унинг қилмишидан ҳайратга тушдим», — деди у журналистларга.

Рамос ўрта мактабни тугатмаган. У полицияга тушмаган ва руҳий хаста ҳам бўлмаган.

Йигит мактаб яқинига келиб, машинасини уриб олган, полициячини кўргач, ўқ-дорилар солинган сумкасини тушириб юбориб, мактаб томонга қараб қочган. Орқа эшикдан бино ичига кирган. Унинг қўлида АР-15 милтиғи бўлган, аммо ўша пайти отишма бўлмаган.

Полиция мактабни қуршаб олган, болалар ва ходимлар чиқиб кетиши учун деразаларни синдирган.

Ҳукумат маълумотларига кўра, Рамос отишмадан бир неча кун аввал қонуний равишда иккита милтиқ ва 375 та патрон сотиб олган.

Айни пайтда Facebook компанияси тергов билан ҳамкорлик қилмоқда.

Мактабдаги отишма ҳақида илк хабарлар маҳаллий вақт билан 24 май куни 11:43 да (Тошкент вақти билан 21:43) келиб тушганди. Ҳужумчи 18 ёшли йигит бўлиб чиқди, у полициячилар томонидан қўлга олиниш чоғида ҳалок бўлди.

Associated Press қайд этишича, Ювалддаги отишма қурбонлар сони бўйича сўнгги ўн йилдаги энг оммавийси бўлди. 2012 йил 14 декабрь куни Коннектикут штатидаги Сенди-Хук мактабида юз берган отишмада 20 нафар бола ва олти нафар катта ёшлилар ҳалок бўлганди.