Жаҳон банки Ўзбекистон билан ҳамкорликнинг янги дастурини қабул қилди

Жаҳон банки гуруҳи Ўзбекистон билан 2022–2026 йилларга мўлжалланган ҳамкорликнинг янги дастурини қабул қилди.

1992–1993 йилларда Ўзбекистон Жаҳон банки гуруҳи таркибидаги ташкилотларга аъзо бўлди. Янги ҳамкорлик дастури Жаҳон банки ва ҳукуматнинг биргаликдаги 30 йиллик тажрибасига асосланади. 

2017 йилдан бери Жаҳон банки расмийлар билан яқин ҳамкорликда ишламоқда, буни молиялаштириш, таҳлилий хизматлар ва техник ёрдамнинг мисли кўрилмаган кўлами, хилма-хиллиги ва динамизми тасдиқлайди.

Жаҳон банки ва Халқаро молия корпорацияси (ХМК) ҳукуматга Ўзбекистонда иқтисодиёт, жамият ва хусусий секторни ўзгартириш ва модернизация қилиш бўйича дадил ислоҳотларни амалга оширишда ёрдам берди. 

Бу билан улар мамлакатнинг янги тарихида кўплаб муҳим марраларни қўлга киритишига ҳисса қўшди.

Ҳамкорлик Ўзбекистоннинг инклюзив ва барқарор бозор иқтисодиётига ўтиш жараёнини жадаллаштиришга қаратилган учта стратегик мақсадга йўналтирилади:

• хусусий секторда инклюзив бандликни ошириш;  
• инсон капиталини ривожлантириш; 
• яшил иқтисодий ўсиш орқали фаровонлик ва барқарор ривожланишни ошириш.

Ҳамкорлик дастури мавжуд муаммолар ва Ўзбекистонни ривожлантиришнинг потенциал имкониятларини ҳар томонлама таҳлил қилиш асосида ишлаб чиқилган. У мамлакатдаги ижтимоий-иқтисодий вазиятни комплекс диагностика қилиш доирасида ўтказилди. 

Шунингдек, ҳукумат ва ҳудудий ҳокимият органлари, фуқаролик жамияти, хусусий сектор, илмий доиралар ва ривожланиш бўйича халқаро ҳамкорлар вакиллари билан фаол маслаҳатлашувлар натижалари ҳам ҳисобга олинди.

 Ўзбекистон билан сўнгги беш йилдаги муваффақиятли ҳамкорлигимиз ва бошқа ўтиш давридаги иқтисодиётдаги трансформацияларни қўллаб-қувватлаш бўйича тажрибамизга таянган ҳолда ҳамкорлик ҳукуматга бозор ислоҳотларининг кейинги авлодини амалга оширишда ёрдам беради, — деди Жаҳон банки минтақавий директори Татяна Проскурякова. 

Аввалроқ Ўзбекистонда хусусий бизнес ўсиши ва кенгайиши учун жой етишмаётгани ҳақида хабар берилган эди.