АҚШда собиқ президент кичик Жорж Бушга суиқасд режалаштирган ироқлик шахс қўлга олинди

ИШИДга алоқадор деб тахмин қилинаётган асли ироқлик шахс АҚШнинг 43-президенти кичик Жорж Бушга суиқасд қилишни режалаштирган. Бу ҳақда ФҚБ ҳужжатларига таяниб, Forbes ва ABC News хабар бермоқда.

Гумонланувчи — Огайо штати Колумбус шаҳрида яшовчи 52 ёшли Шаҳоб Аҳмад Шаҳоб бўлиб, у АҚШга 2020 йилда бошпана сўраб ариза бериш орқали келган. У 24 май куни қўлга олинди.

ФҚБ маълумотларига кўра, гумонланувчи 2021 йилдан буён Бушга суиқасд режалаштириб келган. У Далласда президентни кузатиш, сиёсатчи қароргоҳи яқинида видеотасвирлар олиш орқали жиноятга тайёрланган, шунингдек, суиқасднинг бошқа иштирокчилари — ўзининг Ироқ, Туркия, Миср ва Даниядаги юртдошларини Мексика орқали АҚШга йўналтиришни режалаштирган.

ФҚБ гумонланувчининг WhatsApp’даги ёзишмаларини кузатиш орқали ва икки информатор берган маълумотлар шарофати билан суиқасд олдини олишга муваффақ бўлган. Улардан бирига Шаҳоб «Ал-Раёд» бўлинмасининг бир қисми эканини айтган, уни эса Саддам Ҳусайннинг собиқ учувчиси бошқарган. Бундан ташқари, информаторнинг сўзларига кўра, гумонланувчи «Баас» (араб социалистик тикланиш) партияси ва ИШИД чатларига кирган.

Шаҳоб ўзининг Бушни ўлдириш ниятини АҚШ бостириб кирганидан кейин кўплаб ироқликлар ҳалок бўлиши, мамлакат эса парчаланиб кетишига уни жавобгар деб ҳисоблаши билан изоҳлади.

Кичик Жорж Буш 2001—2009 йилларда АҚШ президенти лавозимини эгаллаган. 2003 йилда Америка Ироққа бостириб кирган. Бунинг расмий сабаби сифатида Ироқ бош вазири Саддам Ҳусайннинг террорчилар билан алоқадорлиги айтилган. Ҳусайн режими ағдарилгач, Америка қўшинлари «Ал-Қоида» ва ИШИДга қарши маҳаллий операциялар ўтказиш билан шуғулланган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.