2022-yilning yanvar oyida O‘zbekistonda bir necha kun yagona elektr tarmog‘idagi avariya natijasida elektr energiyasi uzilishi kuzatilgandi. Iste’molchilar huquqlarini himoya qilish agentligi axborot xizmati rahbari Mohruxsor Tog‘ayevaning ma’lum qilishicha, mazkur uzilishlar sabab iste’molchilarga 4,5 milliard so‘m qayta hisob-kitob qilingan.
25-27-yanvar kunlari Markaziy Osiyo yagona elektr tarmog‘ida avariya sodir bo‘lishi natijasida respublikaning barcha hududlarida elektr energiya ta’minotida o‘chishlar sodir bo‘lgan. Uni oqibatida tabiiy gaz ta’minotida vujudga kelgan uzilishlar sababli “Toshissiqquvvati” DUK tomonidan iste’molchilarga belgilangan talablarga muvofiq issiqlik ta’minoti yetkazib bermaslik holati aniqlangan.
Natijada, agentlik tomonidan “Toshissiqquvvati” DUKga berilgan topshiriqqa asosan abonentlarga 4,5 milliard so‘m miqdoridagi mablag‘ belgilangan tartibda qayta hisob-kitob qilib berilishi ta’minlangan.
Xuddi shu kabi o‘rganishlar respublikaning 9 ta hududlarda ham amalga oshirilib, uning natijasida 1,222 milliard so‘m miqdorida ortiqcha olingan mablag‘lar aniqlanib, bugungi kunda ushbu mablag‘lar iste’molchilarga qayta hisob kitob qilib berilishi ta’minlangan.
Avvalroq Energetika vaziri o‘rinbosari Sherzod Xo‘jayev O‘zbekiston bo‘ylab ro‘y bergan elektr ta’minotidagi uzilish sabablari hozir ham o‘rganilayotganini aytgandi.
Izoh (0)