2022 йилнинг январь ойида Ўзбекистонда бир неча кун ягона электр тармоғидаги авария натижасида электр энергияси узилиши кузатилганди. Истеъмолчилар ҳуқуқларини ҳимоя қилиш агентлиги ахборот хизмати раҳбари Моҳрухсор Тоғаеванинг маълум қилишича, мазкур узилишлар сабаб истеъмолчиларга 4,5 миллиард сўм қайта ҳисоб-китоб қилинган.
25-27 январь кунлари Марказий Осиё ягона электр тармоғида авария содир бўлиши натижасида республиканинг барча ҳудудларида электр энергия таъминотида ўчишлар содир бўлган. Уни оқибатида табиий газ таъминотида вужудга келган узилишлар сабабли «Тошиссиққуввати» ДУК томонидан истеъмолчиларга белгиланган талабларга мувофиқ иссиқлик таъминоти етказиб бермаслик ҳолати аниқланган.
Натижада, агентлик томонидан «Тошиссиққуввати» ДУКга берилган топшириққа асосан абонентларга 4,5 миллиард сўм миқдоридаги маблағ белгиланган тартибда қайта ҳисоб-китоб қилиб берилиши таъминланган.
Худди шу каби ўрганишлар республиканинг 9 та ҳудудларда ҳам амалга оширилиб, унинг натижасида 1,222 миллиард сўм миқдорида ортиқча олинган маблағлар аниқланиб, бугунги кунда ушбу маблағлар истеъмолчиларга қайта ҳисоб китоб қилиб берилиши таъминланган.
Аввалроқ Энергетика вазири ўринбосари Шерзод Хўжаев Ўзбекистон бўйлаб рўй берган электр таъминотидаги узилиш сабаблари ҳозир ҳам ўрганилаётганини айтганди.
Изоҳ (0)