24-may kuni tashqi ishlar vaziri vazifasini bajaruvchi Vladimir Norov O‘zbekistonga tashrif buyurgan AQSH davlat kotibining Janubiy va Markaziy Osiyo ishlari bo‘yicha yordamchisi Donald Lu bilan uchrashuv o‘tkazdi. Bu haqda TIV matbuot xizmati xabar berdi.
Tomonlar turli sohalardagi O‘zbekiston—AQSH munosabatlarining bugungi holati va rivojlanish istiqbollarini muhokama qilgan.
Amerika tomoni O‘zbekistonda prezident Shavkat Mirziyoyev rahbarligida amalga oshirilayotgan o‘zgarishlarni, shuningdek, mamlakatning amaliy va ochiq tashqi siyosat yo‘lini yuksak baholagan. AQSH hukumati O‘zbekistonda islohotlar jarayoniga faol ko‘maklashishga tayyorligi ta’kidlangan.
“So‘nggi yillarda siyosiy muloqotni faol tus olgani mamnuniyat bilan qayd etildi. Yillik maslahatlashuvlar mexanizmini Strategik sheriklik muloqotiga aylantirish to‘g‘risidagi qaror va uning birinchi majlisi 2021-yili Toshkent shahrida muvaffaqiyatli o‘tkazilishi ikki tomonlama aloqalar tarixida muhim voqea bo‘ldi va tomonlarning o‘zaro hamkorlikni kompleks rivojlantirishga tayyorligini ko‘rsatdi”, — deyiladi xabarda.
Shuningdek, Vashington shahrida Strategik sheriklik muloqotining navbatdagi sessiyasini va uning ekspertlar darajasidagi sohaviy uchrashuvlarini o‘tkazishga puxta tayyorlarlik ko‘rish muhimligi qayd etilgan.
O‘zbekiston va Qo‘shma Shtatlarning infratuzilma, energetika, transport, atrof-muhitni muhofaza qilish va iqlim o‘zgarishiga qarshi kurash sohalarida aniq natijalarga erishish maqsadida “C5+1” shaklidagi hamkorlikni davom ettirishdan manfaaotdorligi ta’kidlangan.
Bundan tashqari, mintaqaviy va xalqaro masalalar yuzasidan ham fikr almashilgan. O‘zbekistonning Afg‘onistonga gumanitar yordam ko‘rsatish, ushbu mamlakatda uzoq muddatli tinchlik o‘rnatish va uning iqtisodiy tiklanishiga yordam beradigan loyihalarni ilgari surish borasidagi sa’y-harakatlari yuksak baholangan.
Eslatib o‘tamiz, 2021-yil 13-dekabr kuni sobiq tashqi ishlar vaziri Abdulaziz Komilov O‘zbekiston bilan AQSH o‘rtasidagi Strategik sheriklik muloqotining birinchi majlisida ishtirok etish uchun Toshkent shahriga kelgan AQSH davlat kotibining Janubiy va Markaziy Osiyo masalalari bo‘yicha yordamchisi Donald Lu bilan uchrashgan edi. Uchrashuvda AQSH tomoni yangi O‘zbekistonda olib borilayotgan demokratik o‘zgarishlar va ijtimoiy-iqtisodiy islohotlar dasturini qo‘llab-quvvatlanishini ma’lum qilgandi.
Izoh (0)