24-may kuni Senatning Mudofaa va xavfsizlik masalalari qo‘mitasining yigirma oltinchi yalpi majlis oldidan majlisi bo‘lib o‘tdi. Bu haqda parlament yuqori palatasi matbuot xizmati xabar berdi.
Majlisda “Yong‘in xavfsizligi to‘g‘risida”gi qonunning ijrosi, xususan, is gazidan zaharlanishning oldini olish bo‘yicha ko‘rilayotgan choralar muhokama qilingan. Ta’kidlanishicha, senatorlar boshchiligidagi ishchi guruh tomonidan olib borilgan o‘rganishlar davomida mazkur tarmoqda qator tizimli muammo hamda kamchiliklar mavjudligi aniqlangan.
2020 va 2021-yillarda hamda 2022-yilning o‘tgan davrida is gazidan zaharlanish holatlarining oldini olish maqsadida O‘zbekistonda 8 milliondan ortiq xonadonda isitish tizimlari, dudburonlar ko‘rikdan o‘tkazilgan va boshqa chora-tadbirlar amalga oshirilgan.
Shu bilan birga, mutasaddi vazirlik va idoralar tomonidan is gazidan zaharlanish holatlarining oldini olish bo‘yicha OAV, mahallalar, ta’lim muassasalari, tashkilot va korxonalarda targ‘ibot tadbirlari o‘tkazilgan. Prokuratura organlari tomonidan 105 ta tekshirish o‘tkazilgan. Aniqlangan qonun buzilishi holatlari yuzasidan mutasaddi tashkilotlarga 30 dan ortiq taqdimnoma, 25 tadan ziyod ogohlantiruvlar kiritilib, 25 nafar shaxs intizomiy va 4 nafar shaxs ma’muriy javobgarlikka tortilgan.
Senatorlarning qayd etishicha, o‘tkazilayotgan profilaktik tadbirlar yetarli darajada o‘z samarasini bermagan. Oqibatda 2020-yildan 2022-yilning o‘tgan davrida is gazidan zaharlanish bilan bog‘liq 428 ta holat sodir bo‘lgan. Natijada 366 nafar fuqaro vafot etgan va 307 nafar shaxs turli darajada jarohatlangan.
Shuningdek, milliy qonunchilikda is gazi chiqishi, uni bartaraf etish bo‘yicha zarur chora-tadbirlarni ko‘rish, aholini muhofaza qilish, xususan, zaharlanish holatlarining oldini olish borasidagi munosabatlarni o‘zida ifoda etuvchi yaxlit normativ-huquqiy hujjat mavjud emasligi ham tarmoqda ijobiy o‘zgarish bo‘lmayotganligiga bir sabab sifatida aytib o‘tilgan. Xususan, amaldagi qonunchilikda is gazidan zaharlanish holatlarining oldini olishga mas’ul bo‘lgan vakolatli davlat organi aniq belgilanmagan. Natijada bu borada amaliyotda tushunmovchiliklar kelib chiqmoqda.
Qayd etilishicha, is gazining chiqishi bilan bog‘liq holatlar asosan ko‘p kvartirali uylarda yuzaga kelmoqda.
Bundan oldin Qo‘qondagi “Hazrati Abbos” masjidi imomi va uning oila a’zolari, Andijonda esa to‘rt nafar fuqaro is gazidan zaharlanib vafot etgani to‘g‘risida xabar berilgandi.
Izoh (0)