Saloh, Son va Ederson. APLda 2021/22-yilgi mavsumning eng yaxshilari taqdirlandi

Angliya Premyer Ligasining 2021/22-yilgi mavsumi yakunlandi.

Son Hyon Min va Muhammad Saloh chempionatda mavsumning eng yaxshi to‘purariga aylandi. “Tottenhem” yarim himoyachisi va “Liverpul” vingeri 35 tadan o‘yin o‘tkazib, 23 tadan golga mualliflik qildi.

Shuningdek, Saloh musobaqaning eng yaxshi assistenti nomiga sazovor bo‘ldi. Misrlik futbolchi hisobida 13 ta golli uzatma mavjud. Undan keyingi o‘rinni 12 ta assist bilan jamoadoshi Trent Aleksander-Arnold egalladi.

APLning “Oltin qo‘lqop” sovriniga Alisson (“Liverpul”) va Ederson (“Manchester Siti”) loyiq ko‘rildi. Ikkala darvozabon ham mavsum davomida 20 tadan quruq o‘yin o‘tkazgan.

Alisson ushbu sovrinni faoliyati davomida ikkinchi marta qo‘lga kiritmoqda. Ederson esa ketma-ket uchinchi marta “Oltin qo‘lqop” sovriniga ega chiqdi.