Pep Gvardiola APL chempionligiga erishish bo‘yicha Mourinyo va Vengerni ortda qoldirdi, faqat bir murabbiy undan oldinda

“Manchester Siti” so‘nggi turda “Aston Villa” ustidan g‘alaba qozonib, 2021/22-yilgi mavsum Angliya chempionligini qo‘lga kiritdi.

“Shaharliklar” bosh murabbiyi Pep Gvardiola 4-marta APLda (1992-yilda tashkil etilgan) chempionga aylandi. Bu borada ispaniyalik mutaxassis Joze Mourinyo va Arsen Vengerni ortda qoldirdi. Har ikkala murabbiy ushbu musobaqada 3 martadan g‘olib bo‘lgan edi.

Angliya chempionligini qo‘lga kiritish bo‘yicha Aleks Fergyuson yetakchi hisoblanadi. Shotlandiyalik sobiq murabbiy “Manchester Yunayted” bilan birga 13 marta APLda chempionga aylangan.

Gvardiola o‘z faoliyati davomida 10-marta chempionat g‘olibligini qo‘lga kiritmoqda. “Manchester Siti” bilan 4 marta Angliyada birinchi o‘rinni egallagan bo‘lsa, Germaniya chempionatida “Bavariya” bilan, Ispaniyada “Barselona” bilan 3 martadan bu natijaga erishgan.

Pep 2008/09-yilgi mavsum “Barselona”dagi debyut mavsumidan buyon mamlakat chempionligini qo‘lga kiritish bo‘yicha top-5 ligalarda yetakchi hisoblanadi. 13 yildan buyon hech bir murabbiy 10 marta chempion bo‘lmadi.