“Barselona” La Ligada sermahsullik borasida so‘nggi 18 yillikdagi eng yomon natijasini qayd etdi

“Barselona” Ispaniya chempionatining 38-turida “Vilyarreal”ga 0:2 hisobida imkoniyatni boy berdi.

Kataloniyaliklar 2008-yildan buyon ilk bor o‘z maydonida “Vilyarreal”ga mag‘lub bo‘ldi. Bu davr ichida “Kamp Nou”da 2 marta durang natija qayd etilgan bo‘lsa, 11 marta ketma-ket “ko‘k-anorranglilar” g‘alabaga erishgan.

“Vilyarreal” ustozi Unai Emeri “Kamp Nou”dagi 14-o‘yinida ilk bor g‘alaba qozondi. Bunga qadar “PSJ”, “Sevilya”, “Valensiya” kabi jamoalarni boshqargan murabbiy kataloniyaliklar stadionida 13 o‘yindan buyon mag‘lub bo‘lib kelayotgan edi.

“Barselona” 2021/22-yilgi mavsum barcha musobaqalarda 86 ta gol urishga muvaffaq bo‘ldi. Jamoa 2004/05-yilgi mavsumdan buyon ilk bor yuztadan kam gol urdi.

Ispaniya chempionatida esa Xavi shogirdlari 68 ta gol urdi. Bundan kam gol so‘nggi bor 2003/04-yilgi mavsumda qayd etilgan bo‘lib, o‘shanda jamoa 63 ta gol bilan mavsumni yakunlagan edi.