Qozog‘iston prezidenti Qosim-Jo‘mart To‘qayev Navro‘z munosabati bilan Olmaotada o‘tkazilgan bayram tadbirida mamlakatni keng ko‘lamli islohotlar kutayotganini ma’lum qildi, deb xabar beradi “TASS”.
“Oldinda bizni keng ko‘lamli islohotlar, yangi Qozog‘istonni qurish kutib turibdi. Sizlar bilan, yoshlar bilan birgalikda biz, albatta, yangi mamlakatni, yangi Qozog‘iston, ikkinchi respublikani quramiz va buni uddalaymiz”, — deydi u. Prezidentning chiqishi respublika telekanallarida to‘g‘ridan to‘g‘ri efirga uzatilgan.
Davlat rahbari yanvar oyidagi tartibsizliklarda bosqinchi va terrorchilarning asosiy zarbasi Olmaotaga to‘g‘ri kelgani, ko‘plab begunoh insonlar halok bo‘lgani va jabrlangani, shahar infratuzilmasiga ulkan zarar yetkazilganini eslatib o‘tgan. “Olmaotaliklar, davlatchiligimiz uchun misli ko‘rilmagan tahdid qarshisida qo‘rqmaganingiz uchun sizlardan minnatdorman. Og‘ir damda birlashdingiz, butun mamlakat sizlar bilan bo‘ldi. Xalqimizning birdamligi va hamjihatligi sharofati bilan ushbu og‘ir sinovni yengib o‘tdik”, — deydi To‘qayev.
Qozog‘iston prezidenti Qosim-Jo‘mart To‘qayev yanvar oyida mamlakatning qator viloyatlarida sodir bo‘lgan ommaviy tartibsizliklarga baho berib, “maqsad oliy rahbariyatni almashtirish bo‘lgani”ni ta’kidlagandi.
Eslatib o‘tamiz, Qozog‘istonda 2-yanvar kuni gaz narxi keskin oshishi sababli ommaviy norozilik namoyishlari boshlanib, bir necha kundan so‘ng ular tartibsizliklarga aylangandi. 4 va 5-yanvar kunlari Olmaotada namoyishchilarning xavfsizlik xodimlari bilan to‘qnashuvi kuzatilgan.
Mamlakatdagi keskinlik munosabati bilan To‘qayev KXShT (Kollektiv xavfsizlik shartnomasi tashkiloti)ga murojaat qilib, yordam so‘radi. Tashkilot cheklangan muddatga respublikaga tinchlikparvar kontingent yuborgandi. Shuningdek, To‘qayev tartibsizliklar sabablarini o‘rganuvchi, aybdorlarni aniqlovchi va javobgarlikka tortuvchi tergov guruhini tuzishni buyurgan. Davlat rahbarining so‘zlariga ko‘ra, tartibsizliklar ishtirokchilari xorijda malaka oshirgan.
Qozog‘iston Ichki ishlar vazirligining xabar berishicha, maxsus operatsiyalar davomida 4000 nafarga yaqin terrorchi hibsga olingan, 26 nafar “qurolli jinoyatchi” o‘ldirilgan, yana 18 nafari yarador qilingan. Qozog‘iston Bosh prokuraturasi ommaviy tartibsizliklar, shuningdek, terrorchilik aktlarini sodir etish bo‘yicha tergov doirasida jinoiy ish qo‘zg‘atdi.