Қозоғистон Миллий хавфсизлик қўмитаси ислоҳ қилинади

Қозоғистон президенти Қосим-Жўмарт Тўқаев республика Миллий хавфсизлик қўмитасини ислоҳ қилиш ҳақидаги фармонни имзолади. МХҚнинг янгиланган тузилмаси тасдиқланди, деб хабар беради Anadolu агентлиги.

Ҳужжат билан Қозоғистон президентининг 15 та фармонига тузатишлар киритилган, улар миллий хавфсизлик органлари фаолиятини такомиллаштиришни кўзда тутади.

Хусусан, МХҚнинг янгиланган тузилмаси тасдиқланди, қўмитанинг алоҳида давлат муассасалари қайтадан ташкил қилинди ва такомиллаштирилди.

Фармон лойиҳасига кўра, қайтадан ташкил қилинадиган республика давлат муассасалари рўйхатига, хусусан, МХҚнинг Ахборотни техник ҳимоя қилиш маркази, шунингдек, муассасанинг Ахборот хавфсизлиги соҳасидаги мутахассисларни тайёрлаш ва малакасини ошириш маркази киради. Улар «Қозоғистон Республикаси Миллий хавфсизлик қўмитасининг Ахборотни техник ҳимоялаш ва давлат сирларини ҳимоя қилиш соҳасида мутахассисларни тайёрлаш маркази» республика давлат муассасасига бирлаштирилади.

Бундан ташқари, чегара хизматининг ҳудудий департаментлари қайта ташкил қилинади, МХҚ авиация хизматига эга унинг бошқармасини ҳам қўшиб қўйишади.

Тўқаев МХҚ ислоҳ этилишини жорий йил 12 январида Мажлис йиғилишида эълон қилганди.

«Қуролли кучларимиз, ҳуқуқ-тартибот тузилмаларимиз, миллий хавфсизлик органларимиз, ташқи разведкамизни қайта қуриш керак бўлади. Уларнинг барчаси битта мақсад — фуқароларимизни, конституциявий тузумни ва суверенитетимизни ҳар қандай хусусиятга ва кўламга эга бўлган хавф остида максимал даражада самарали ҳимоя қилиш йўлида уйғунлик билан ишлаши керак. Буни давлатимизнинг туб манфаатлари талаб қилади», — деган эди президент ўшанда.

Эслатиб ўтамиз, январь бошида Қозоғистонда оммавий тартибсизликлар бўлиб ўтганди, уларнинг иштирокчилари полициячиларга ва ҳарбийларга ҳужум қилганди. Тўқаев бўлиб ўтган воқеаларни давлат тўнтаришига уриниш деб атади ва Коллектив хавфсизлик шартномаси ташкилотига мурожаат қилишга мажбур бўлди. 7 январга келиб, вазиятни барқарорлаштиришга муваффақ бўлинди. Кейинроқ давлат раҳбари давлат тўнтариши уюштиришга уринганлар орасида юқори мансабли шахслар, шунингдек, ҳарбий ва махсус органлар раҳбарлари бўлганини маълум қилди.