Ўзбекистон ҳудудларида 2022 йилда цемент-бетон қопламали ички йўлларни қуриш параметрлари тасдиқланди

Президент қарори билан Қорақалпоғистон Республикаси, вилоятлар ва Тошкент шаҳрида 2022 йилда цемент-бетон қопламали ички йўлларни қуриш параметрлари тасдиқланди. Бу ҳақда Telegram’даги «Нигоҳ» канали хабар қилди.

Ҳужжатга кўра, 2022 йилда цемент ёки бетон ишлаб чиқарувчиларни жалб қилган ҳолда цемент-бетон қопламали ички йўлларни қуриш ва таъмирлаш ишлари кластер усулида амалга оширилади. 2022 йилда кластер усулида цемент-бетон қопламали ички йўлларни қуриш ишлари бўйича:

• манзилли рўйхатлар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан секторлар раҳбарларининг жойларда жамоатчилик фикри ва талабини инобатга олган ҳолда билдирган таклифлари асосида шакллантирилади ҳамда Қорақалпоғистон Республикаси Жуқорғи Кенгеси, халқ депутатлари вилоятлар ва Тошкент шаҳар Кенгашлари томонидан тасдиқланади;
• лойиҳа ташкилотларини жалб этиш, масъул ташкилотлар билан техник шартларни келишиш, лойиҳа-смета ҳужжатларини ишлаб чиқиш ва уларни давлат экспертизасидан ўтказишни ташкил этиш ишлари буюртмачи ташкилотлар томонидан амалга оширилади;
• кластер усулида цемент-бетон қопламали ички йўлларни қуриш ишларини амалга оширувчи бош пудратчи ташкилот Қорақалпоғистон Республикаси Жуқорғи Кенгеси, халқ депутатлари вилоятлар ва Тошкент шаҳар Кенгашлари томонидан энг яхши таклифларни танлаб олиш орқали аниқланади;
• қурилиш ишлари якунланиб, объектлар фойдаланишга қабул қилингандан сўнг шаҳар ва туман ободонлаштириш бошқармалари тасарруфига берилади ҳамда ушбу ички йўлларни бош пудратчи томонидан ўз маблағлари ҳисобидан 5 йил давомида кафолатли соз ҳолатда сақлаш ва эксплуатация қилиш ишларини амалга ошириш бўйича бош пудратчи билан шартнома тузилади.