Buxoro, Farg‘ona va Sirdaryo viloyatlarida kredit mablag‘larini talon-toroj qilish holatlari aniqlandi

Buxoro viloyati Qorako‘l tuman bo‘limi tomonidan o‘tkazilgan tergovga qadar tekshiruvda tumandagi bank filiali tomonidan “Sh.O.” MCHJga yangi to‘quvchilik dastgohlarini sotib olish maqsadida ajratilgan 2 milliard so‘m miqdoridagi kredit talon-toroj qilingani aniqlandi. Bu haqda Bosh prokuratura huzuridagi departament ma’lum qildi.

Aniqlanishicha, ular ajratilgan kreditning 68,1 ming dollarini naqdlashtirib olib, qolgan 124,6 ming dollarini o‘ziga tegishli bo‘lgan “N.L.” MCHJga o‘tkazgan. Jinoyati fosh bo‘lishining oldini olish maqsadida eski yaroqsiz dastgohlarni olib kelgan, shuningdek, MCHJning moliyaviy natijalari to‘g‘risidagi hisobotiga soxta ma’lumotlar kiritib, qasddan bankrotlikka olib kelgani aniqlangan.

Bundan tashqari, Farg‘ona shahrida faoliyat yurituvchi “T.U.” MCHJ rahbari D.M. va boshqalar oldindan til biriktirib, aslida boshqaga tegishli “Savdo va maishiy xizmat ko‘rsatish shoxobchasi” bino-inshootini soxta hujjatlar asosida go‘yoki o‘ziga tegishli qilib ko‘rsatib, 1,8 milliard so‘mga baholab, kredit ta’minoti sifatida garovga qo‘ygani aniqlangan. Ular trikotaj ishlab chiqarish dastgohi sotib olish uchun ajratilgan 1 milliard so‘m imtiyozli kreditni boshqa MCHJga o‘tkazish orqali talon-toroj qilgan.

Qo‘qon shahrida esa “B.E.” MCHJ rahbari S.Y. fuqaro R. bilan o‘zaro til biriktirib, “O.B.” MCHJga ajratilgan kredit hisobidan qurilish mahsulotlari sotib olishida yordam berish evaziga kredit mablag‘ining 700 million so‘mini “B.E.” MCHJga o‘tkazib, talon-toroj qilgan.

Shuningdek, Qarshi shahrida yashovchi fuqaro J.B. “Y.T.” MCHJ va ukasi nomidagi YaTT “B.B.”ni boshqarib kelib, viloyat tijorat banki filialidan aylanma mablag‘larni to‘ldirish va issiqxona qurish uchun ajratilgan 443,3 million so‘m imtiyozli kredit mablag‘ini talon-toroj qilgani, shuningdek, garov ta’minoti sifatida qo‘yilgan Tracker'ni soxta hujjatlar orqali garovdan chiqarib, taqiqqa qo‘yilgan mulkni qonunga xilof ravishda tasarruf etgani aniqlangan.

Sirdaryo viloyatining Shirin shahrida faoliyat yurituvchi “G.H.” va “S.E.” MCHJlar rahbari S.T. hududiy tijorat banki filialidan mebel ishlab chiqarish faoliyatini yo‘lga qo‘yish uchun ajratilgan 450 million so‘m imtiyozli kredit mablag‘ini belgilangan faoliyat turiga yo‘naltirmasdan, o‘zlashtirish yo‘li bilan talon-toroj qilgani ma’lum bo‘lgan.

Bundan tashqari, Xovos tumanida faoliyat yurituvchi “K.o.” MCHJ rahbari M.U. bank filialidan ajratilgan kredit mablag‘i evaziga Qozog‘istondan olib kelingan 107 bosh chorva mollarini fuqarolarga naqd pulga sotib yuborib, 420 million so‘m imtiyozli kredit mablag‘ini talon-toroj qilgani aniqlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Bekobodda yo‘l ta’mirlash uchun ajratilgan 738 tonna mahsulotni qariyb 1 mlrd so‘mga sotib yuborgan mansabdorlar ushlangani, Surxondaryoda non ishlab chiqarish sexi va do‘kon qurish uchun ajratilgan 2 mlrd so‘m kreditni o‘zlashtirgan tadbirkor qo‘lga olingani to‘g‘risida xabar berilgandi.