Namanganda davlat chegarasini chetlab o‘tib, mamlakatga noqonuniy olib kirilgan 10 mingdan ortiq zargarlik buyumlari to‘xtatib qolindi. Bu haqda “Daryo” muxbiri Azizbek Abduvaliyev xabar bermoqda.
Namangan viloyatining Yangiqo‘rg‘on tumanida yashovchi 30 yashar Shahzod G‘ulomjonov (ism-shariflar shartli) Xursand ismli shaxs bilan til biriktirib, o‘zbek-qirg‘iz davlat chegarasidagi bojxona nazorati o‘rnatilmagan dala aylanma yo‘li orqali xorijda ishlab chiqarilgan, hech qanday hujjatlari bo‘lmagan, 22 ta polietilen paketga joylangan 10720 dona zargarlik buyumini olib o‘tadi.
Ushbu buyumlar Majid Akromxonov boshqaruvidagi Lacetti rusumli avtomobilning orqa o‘rindig‘i, gaz ballon orasi hamda old kapot ostiga yashiriladi. Haydovchi ularni Toshkentda yashovchi, shaxsiga aniqlik kiritilayotgan Hoji va Rais laqabli shaxslarga yetkazib berish maqsadida Nanay—Namangan yo‘nalishida harakatlanib ketayotganda DXX Namangan viloyat boshqarmasi va viloyat bojxona boshqarmasi tezkor xodimlari tomonidan qo‘lga olinadi.
Moliya vazirligi huzuridagi Davlat asllik darajasini belgilash palatasi ekspertlari xulosasiga ko‘ra, ashyoviy dalil tariqasida olingan zargarlik buyumlarining umumiy og‘irligi 27 027,03 grammni tashkil etadi.
Namangan baholash va konsalting markazining hisobotida keltirilishicha, ashyoviy dalil tariqasida olingan zargarlik buyumlarining bozor narxi 536 783 600 so‘mga teng.
Mazkur holat yuzasidan Shahzod G‘ulomjonov va Majid Akromxonovga nisbatan jinoyat ishi qo‘zg‘atildi. 27 kilogrammdan ortiq noqonuniy tilla buyumlari esa davlat foydasiga musodara qilindi.
Izoh (0)