Бухоро вилояти Қоракўл туман бўлими томонидан ўтказилган терговга қадар текширувда тумандаги банк филиали томонидан «Ш.О.» МЧЖга янги тўқувчилик дастгоҳларини сотиб олиш мақсадида ажратилган 2 миллиард сўм миқдоридаги кредит талон-торож қилингани аниқланди. Бу ҳақда Бош прокуратура ҳузуридаги департамент маълум қилди.
Аниқланишича, улар ажратилган кредитнинг 68,1 минг долларини нақдлаштириб олиб, қолган 124,6 минг долларини ўзига тегишли бўлган «Н.Л.» МЧЖга ўтказган. Жинояти фош бўлишининг олдини олиш мақсадида эски яроқсиз дастгоҳларни олиб келган, шунингдек, МЧЖнинг молиявий натижалари тўғрисидаги ҳисоботига сохта маълумотлар киритиб, қасддан банкротликка олиб келгани аниқланган.
Бундан ташқари, Фарғона шаҳрида фаолият юритувчи «Т.У.» МЧЖ раҳбари Д.М. ва бошқалар олдиндан тил бириктириб, аслида бошқага тегишли «Савдо ва маиший хизмат кўрсатиш шохобчаси» бино-иншоотини сохта ҳужжатлар асосида гўёки ўзига тегишли қилиб кўрсатиб, 1,8 миллиард сўмга баҳолаб, кредит таъминоти сифатида гаровга қўйгани аниқланган. Улар трикотаж ишлаб чиқариш дастгоҳи сотиб олиш учун ажратилган 1 миллиард сўм имтиёзли кредитни бошқа МЧЖга ўтказиш орқали талон-торож қилган.
Қўқон шаҳрида эса «Б.Э.» МЧЖ раҳбари С.Й. фуқаро Р. билан ўзаро тил бириктириб, «О.Б.» МЧЖга ажратилган кредит ҳисобидан қурилиш маҳсулотлари сотиб олишида ёрдам бериш эвазига кредит маблағининг 700 миллион сўмини «Б.Э.» МЧЖга ўтказиб, талон-торож қилган.
Шунингдек, Қарши шаҳрида яшовчи фуқаро Ж.Б. «Й.Т.» МЧЖ ва укаси номидаги ЯТТ «Б.Б.»ни бошқариб келиб, вилоят тижорат банки филиалидан айланма маблағларни тўлдириш ва иссиқхона қуриш учун ажратилган 443,3 миллион сўм имтиёзли кредит маблағини талон-торож қилгани, шунингдек, гаров таъминоти сифатида қўйилган Tracker'ни сохта ҳужжатлар орқали гаровдан чиқариб, тақиққа қўйилган мулкни қонунга хилоф равишда тасарруф этгани аниқланган.
Сирдарё вилоятининг Ширин шаҳрида фаолият юритувчи «Г.Ҳ.» ва «С.Э.» МЧЖлар раҳбари С.Т. ҳудудий тижорат банки филиалидан мебель ишлаб чиқариш фаолиятини йўлга қўйиш учун ажратилган 450 миллион сўм имтиёзли кредит маблағини белгиланган фаолият турига йўналтирмасдан, ўзлаштириш йўли билан талон-торож қилгани маълум бўлган.
Бундан ташқари, Ховос туманида фаолият юритувчи «К.о.» МЧЖ раҳбари М.У. банк филиалидан ажратилган кредит маблағи эвазига Қозоғистондан олиб келинган 107 бош чорва молларини фуқароларга нақд пулга сотиб юбориб, 420 миллион сўм имтиёзли кредит маблағини талон-торож қилгани аниқланган.
Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.
Аввалроқ Бекободда йўл таъмирлаш учун ажратилган 738 тонна маҳсулотни қарийб 1 млрд сўмга сотиб юборган мансабдорлар ушлангани, Сурхондарёда нон ишлаб чиқариш цехи ва дўкон қуриш учун ажратилган 2 млрд сўм кредитни ўзлаштирган тадбиркор қўлга олингани тўғрисида хабар берилганди.
Мавзуга доир:
Изоҳ (0)