SAIC konserni tarkibiga kiruvchi Xitoyning Roewe kompaniyasi yangi RX5 nomli krossoverini taqdim etdi. Mazkur model 2016-yildan beri ishlab chiqariladi, 2020-yilda esa restaylingga uchrab, nomida Plus qo‘shimchasiga ega bo‘lgan. Markaning o‘lchovlariga ko‘ra, yangi RX5 uchinchi avlod generatsiyasiga taalluqli bo‘lgani sabab faqatgina oilaviy hisoblanmaydi. Xitoydagi ommabop model ancha agressiv ko‘rinishga ega bo‘lgan, o‘lchami kattalashgan va zamonaviy qurilmalarga bilan jihozlangan, xususan, siljitish mumkin bo‘lgan ulkan ekranga, deb xabar beradi Motor.
Yangi Roewe RX5’ning tashqi ko‘rinishidagi o‘ziga xosliklar — uch o‘lchamli murakkab tasvirga ega ulkan radiator panjarasi, ko‘rinmaydigan zonalarni monitoring qilish uchun mo‘ljallangan kameralar joylashgan old qanotdagi qora qoplamali detallar.
Mashina salonida “ikki qavatli” markaziy tonnel saqlab qolingan, multimedia tizimining vertikal tachskrini o‘lchami 27 dyuymga teng gorizontal ekran bilan almashgan. Jumladan, yangi krossoverda ekran bir vaqtning o‘zida axborot-ko‘ngilochar tizimga ham, qurilmalar paneliga ham javob beradi.
Yana bir jihati — uni 30 santimetr o‘ngga siljitib, old o‘rindiqdagi yo‘lovchining foydalanishiga berish imkoniyati borligida. Biroq ushbu holatda uning xavfsizlik yostiqchasi qay yo‘sinda ochilishi noma’lum.
RX5 tizimi 5G aloqa tarmog‘ini qo‘llab-quvvatlaydi va “havodan” yangilanadi. Shuningdek, ovozli boshqaruv ham bor bo‘lib, “menyu”dan panoramali tomni boshqarish funksiyasi ham o‘rin olgan. Qo‘shimcha to‘lov evaziga krossover adaptiv kruiz-nazorat, atrofni to‘liq qamrab oluvchi kameralar va boshqa zamonaviy elektronika bilan jihozlanadi.
Roewe RX5 188 ot kuchini (300 Nm) taqdim etishga qodir 1,5 litrli “turboto‘rtlik” bilan taklif etiladi va u “robot” uzatmalar qutisi yordamida boshqariladi. Kelajakda modelning 79 ot kuchiga ega benzoelektr varianti ham taqdim etilishi rejalashtirilgan. Yangi RX5 sotuvlari Xitoyda 2022-yil oxiridan boshlanadi.
Eslatib o‘tamiz, 2021-yilning yanvarida Xitoyning Roewe Marvel R yo‘ltanlamasi 5G V2X funksiyasiga ega dunyodagi birinchi “aqlli” elektromobilga aylangandi.
Izoh (0)