Fransiyaning Renault guruhi Rossiya aktivlari davlat mulkiga o‘tadi, deb yozadi Meduza Rossiya savdo-sanoat vazirligiga tayanib.
“AvtoVAZ” konserni aksiyalarining Renault guruhi egalik qilgan 67,69 foizi Ilmiy-tadqiqot avtomobil va avtomotor institutiga, “Reno Rossiya”ning 100 foiz aksiyalari esa Moskva hukumatiga o‘tadi. “AvtoVAZ”ning qolgan aksiyalarini “Rostex” davlat korporatsiyasi o‘zida saqlab qoladi.
“Oldi-sotdi kelishuvining muhim sharti shundan iborat bo‘ldiki, Renault o‘zining ‘AvtoVAZ’dagi ulushini kelasi olti yil davomida qayta sotib olishi mumkin. Ikkala oldi-sotdi ham Federal antimonopoliya xizmati tomonidan ma’qullandi”, — deyiladi Savdo-sanoat vazirligi xabarida.
Vazirlik qo‘shimcha qilishicha, “AvtoVAZ” Rossiyada Renault avtomobillariga servis xizmatlarini ko‘rsatish bilan shug‘ullanadi va o‘z zavodlarida Lada avtomobillarining butun lineykasini chiqarishda davom etadi.
“Biz murakkab, biroq zarur qarorni qabul qildik va Rossiyadagi 45 ming nafar xodimlarimizga nisbatan mas’uliyatli tanlovni amalga oshiryapmiz, ayni paytda guruhning samaradorligini va bizning ushbu mamlakatga kelajakda qaytib kelish imkoniyatimizni saqlab qolyapmiz”, — deya izohladi oldi-sotdini Renault Group bosh direktori Luka de Meo.
O‘z navbatida Moskva meri Sergey Sobyanin e’lon qilishicha, shahar hukumati Moskvadagi “Reno” zavodida “Moskvich” brendi ostida yengil avtomobillar ishlab chiqarishni qayta yo‘lga qo‘yishga, shuningdek, korxona kollektivining katta qismini saqlab qolishga qaror qilgan.
“Qayta tiklangan ‘Moskvich’ avtomobil zavodining asosiy texnologik sherigi ‘KamAZ’ bo‘ladi. Birinchi bosqichda ichki yonuv dvigateliga ega klassik avtomobillarni, istiqbolda esa — elektromobillarni ham ishlab chiqarish tashkillashtiriladi”, — deb ma’lum qildi mer o‘z blogida.
Oldi-sotdi summasi oshkor etilmayapti. O‘z press-relizida Renault Group 2021-yil oxiri holatiga guruhning Rossiyadagi aktivlari qiymati 2,195 million yevroni tashkil etganini ma’lum qildi.
23-martdan Renault o‘zining Moskvadagi yo‘ltanlamas modellar lineykasi chiqariladigan yig‘uv zavodidagi ishini to‘xtatgan va “joriy vaziyatni hisobga olib, mavjud variantlarni baholayotgani”ni aytgandi. Renault o‘zining “AvtoVAZ”dagi ulushini sotmoqchiligi 22-aprelda ma’lum bo‘lgandi.
Izoh (0)