Yevropa Komissiyasi (YK) butun jahon iqtisodiyoti va alohida mamlakatlar iqtisodiyotining o‘sish istiqbollarini baholagan holda yangilangan prognozni taqdim etdi.
2022-yilda jahon yalpi ichki mahsulotining o‘sishi bo‘yicha kutilmalar oldingi 5,7 foizdan 3,2 foizga tushirildi (kelgusi yilda 3,5 foiz o‘sish kutilmoqda, bu taxmin o‘zgarishsiz qoldi).
YK energiya ta’minotiga yuqori darajada qaramlik, Rossiya va Ukrainaga geografik yaqinlik tufayli inqirozning iqtisodiy oqibatlari eng og‘iri Yevropa mamlakatlarida bo‘lishini tan oldi.
Yevrohudud uchun prognoz 4 foizdan 2,7 foizga tushirildi. Kelgusi yilda bu ko‘rsatkich 2,7 foizdan 2,3 foizgacha sekinlashishi mumkin.
Umuman olganda, Yevropa Ittifoqi uchun prognoz ham xuddi shunday. Valyuta blokidagi inflyatsiya 2021-yildagi 2,6 foizdan bu yil 6,1 foizga tezlashishi va 2023-yilda 2,7 foizgacha sekinlashishi kutilmoqda.
Shu bilan birga, ishsizlik pasayishda davom etadi va umumiy budjet taqchilligi ham o‘tgan yilgi 4,7 foizdan bu yil 3,6 foizga tushishi kerak.
2022—2023-yillarda Yevropa Ittifoqida energiya narxining oshishiga qarshi kurashish va gumanitar inqirozni bartaraf etish uchun qo‘shimcha xarajatlar yalpi ichki mahsulotning mos ravishda 0,6 va 0,1 foizini tashkil etadi.
Kutilganidek, komissiya ekspertlari Rossiya uchun ham prognozni qayta ko‘rib chiqdilar. Ular bu yil yalpi ichki mahsulotning 10,4 foizga pasayishini, 2023-yilda esa 1,5 foizga tiklanishini taxmin qilmoqdalar.
Avvalroq Ukrainadagi urush O‘zbekiston iqtisodiyotiga ta’siri haqida xabar berilgan edi.
Izoh (0)