16-may kuni Oliy Majlis Qonunchilik palatasida o‘tkazilgan yig‘ilishda O‘zbekiston Liberal-demokratik partiyasi Konstitutsiyaga o‘zgartirish va qo‘shimchalar kiritish jarayonini boshlash taklifi bilan chiqdi. Bu haqda O‘zLiDeP matbuot xizmati xabar berdi.
Yig‘ilishda O‘zbekiston prezidentining lavozimga kirishish marosimidagi nutqi va Konstitutsiya kuniga bag‘ishlangan bayram tabrigida konstitutsiyaviy islohotlarni amalga oshirish zarurati borasida ilgari surilgan fikrlari, bu borada belgilangan eng ustuvor yo‘nalishlar alohida ta’kidlab o‘tilgan.
Ta’kidlanishicha, “Yangi O‘zbekiston taraqqiyot strategiyasi” doirasida ilgari surilayotgan keng ko‘lamli vazifalar Konstitutsiyaviy makonni yanada takomillashtirish ehtiyojini kun tartibiga qo‘ymoqda.
“Shu sababli, bugun Qonunchilik palatasida O‘zbekiston Liberal-demokratik partiyasi fraksiyasining navbatdagi yig‘ilishida deputatlar Bosh qomusimiz – Konstitutsiyaga o‘zgartirish va qo‘shimchalar kiritish jarayonini boshlash taklifi bilan chiqdi. Bu borada fraksiya a’zolari Konstitutsiyaning jamiyat hayotidagi o‘rni va ahamiyatiga alohida to‘xtalib, uni bugungi real voqelikka moslashtirish, Yangi O‘zbekiston taraqqiyot strategiyasi uchun yanada mustahkam huquqiy poydevor yaratish bo‘yicha o‘zlarining aniq pozitsiyalarini ma’lum qilishdi”, — deyiladi xabarda.
Izoh (0)