Surxondaryo viloyatining Bandixon tumanida o‘quvchini kaltaklagan o‘qituvchi Sherzod Yusupov ishdan olindi. Bu haqda “Daryo”ga viloyat xalq ta’limi boshqarmasi axborot xizmati rahbari Rustam Jo‘rayev xabar berdi.
Ma’lum bo‘lishicha, viloyat xalq ta’limi boshqarmasi mas’ullari holatni o‘rganib chiqqan.“O‘quvchini urgan ingliz tili fani o‘qituvchisi Sherzod Yusupov, shu maktab direktorining ma’naviy-ma’rifiy ishlari bo‘yicha o‘rinbosari Soat Ortiqov ishdan olindi”, — deydi Rustam Jo‘rayev.
Mas’ulning ma’lumot berishicha, direktor o‘rinbosari Soat Ortiqov maktab o‘quvchilarining telefondan foydalanish holati kuzatilgani sabab ishdan olingan.
“Direktor Bakir Xolmurodovning ham ishda qolish-qolmasligi ko‘rib chiqilmoqda. Tez orada xulosa qilinadi”, — deydi viloyat xalq ta’limi boshqarmasi axborot xizmati rahbari.
Viloyat xalq ta’limi boshqarmasi axborot xizmati rahbari videoda o‘quvchilar oldida ko‘ringan yana bir shaxsning kimligiga ham aniqlik kiritdi.
“Videoda ko‘ringan bu kishi Jasur Eshboyev bo‘lib, shu sinf — 9-“B” sinfning rahbari hisoblanadi”, — deydi mas’ul.
Eslatib o‘tamiz, Bosh prokuratura zo‘ravon o‘qituvchining ishi yuzasidan unga nisbatan xizmat tekshiruvi tayinlanganini, voqeaning qonuniy yakun topishi viloyat prokuraturasi nazoratida ekani xabar berilgandi. Xalq ta’limi vazirligi vakillari esa o‘qituvchining o‘quvchilarga qo‘l ko‘tarishini keskin qoralagandi.
Izoh (0)