“Tolibon” Afg‘oniston armiyasiga 130 ming kishini qabul qildi

Afg‘oniston hukumati mamlakat qurolli kuchlari tarkibiga 130 ming kishini oldi. Bu haqda “Tolibon” hukumati Mudofaa vazirligi vakili Inoyatulla Havorizmiy ma’lum qildi, deb yozadi “RBK”. Aslida esa 150 ming kishini tanlab olish rejalashtirilgan.

“130 mingdan ortiq odam ro‘yxatga olindi va bu jarayon davom etmoqda. Ro‘yxatdan o‘tkazish yakunlanganidan keyin afg‘onistonliklar mustaqil, yaxshi tuzilgan va sodiq armiyani ko‘radi, u afg‘on o‘lkasi va chegaralari xavfsizligini ta’minlaydi va himoya qiladi”, — dedi u. Havorizmiyning aniqlik kiritishicha, qo‘shinlar uchun forma ishlab chiqilmoqda.

TOLOnews ma’lumotlariga ko‘ra, Afg‘oniston hukumati 2021-yil avgustida “Tolibon” tomonidan egallab olinguniga qadar, milliy armiyada qariyb 250 ming kishi xizmat qilgan.

Vazirlikda hamon ayol xodimlar bor, ularning ko‘pchiligi ishlamayapti, ammo hozircha maosh olib turibdi. Ba’zi ayollar tibbiy-sanitariya qismlarida va idoraga qarashli boshqa bo‘linmalarda haqiqatan ham mehnat qilmoqda, dedi vakil. Ayollarning Mudofaa vazirligida ishlashi masalasi yaqin vaqt ichida hukumat tomonidan hal qilinadi, deya xulosa qildi u.

Ayni vaqtda “Tolibon” harakatiga qarshi kurashayotgan Milliy qarshilik fronti so‘nggi kunlarda bo‘lib o‘tgan jangovar to‘qnashuvlarda “Tolibon” sezilarli darajada talafot ko‘rib, ba’zi aholi punktlaridan chiqib ketganini ma’lum qildi.

“‘Tolibon’ a’zolari oxirgi o‘n kun ichida Panjsher va Bag‘londagi janglarda mag‘lub bo‘ldi. Hozirda ular Dara uyezdidan chekinmoqda, bugun esa Panjsherdagi Shaaba qishlog‘ida hamda Bag‘lonning Xost uyezdidagi Xaavush va Suchi qishloqlarida talafotlar ko‘rdi”, — deya 15-may, yakshanba kuni kechqurun ma’lum qildi Milliy qarshilik fronti vakili.

“Tolibon” ushbu xabar yuzasidan izoh bergani yo‘q.

Avvalroq Afg‘onistonda hokimiyat tepasida bo‘lgan “Tolibon” harakati Panjsher viloyatidagi Milliy qarshilik fronti bilan kechgan qizg‘in janglardan so‘ng viloyatdagi qo‘shinlari sonini 5 minggacha oshirgan edi.

2021-yil sentabrida “Tolibon” xudkushlar batalyonini tuzganini ma’lum qilgandi.

Ular muvaqqat hukumatni ham 2021-yil sentabrida shakllantirgandi. G‘arb mamlakatlari uning hokimiyatini tan olmayapti, biroq harakat fikricha, ular tan olinish uchun barcha shartlarni bajargan.